ek diwane ko aaj aae hain samjhane kai

ek dīvāne ko aaj aa.e haiñ samjhāne ka.ī

pahle maiñ dīvāna thā aur ab haiñ dīvāne ka.ī

aql baḌh kar ban ga.ī thī dard-e-sar jaate kahāñ

aa ga.e dīvāngī kī had meñ farzāne ka.ī

saarī duniyā aa rahī hai dekhne ke vāste

sar-phiroñ ne ek kar Daale haiñ vīrāne ka.ī

kyā hamāre daur ke kuchh piine vaale uTh ga.e

aaj ḳhālī kyoñ nazar aate haiñ paimāne ka.ī

mujh ko chup rahnā paḌā sirf aap kā muñh dekh kar

varna mahfil meñ the mere jaane pahchāne ka.ī

kis tarah vo din bhulā.ūñ jis bure din kā sharīk

ek bhī apnā nahīñ thā aur begāne ka.ī

maiñ vo kāshī kā musalmāñ huuñ ki jis ko ai 'nazīr'

apne ghere meñ liye rahte haiñ but-ḳhāne ka.ī

ek diwane ko aaj aae hain samjhane kai

pahle main diwana tha aur ab hain diwane kai

aql baDh kar ban gai thi dard-e-sar jate kahan

aa gae diwangi ki had mein farzane kai

sari duniya aa rahi hai dekhne ke waste

sar-phiron ne ek kar Dale hain virane kai

kya hamare daur ke kuchh pine wale uTh gae

aaj KHali kyon nazar aate hain paimane kai

mujh ko chup rahna paDa sirf aap ka munh dekh kar

warna mahfil mein the mere jaane pahchane kai

kis tarah wo din bhulaun jis bure din ka sharik

ek bhi apna nahin tha aur begane kai

main wo kashi ka musalman hun ki jis ko ai 'nazir'

apne ghere mein liye rahte hain but-KHane kai