ek do ashk-e-nadamat nahin paida karte

ek do ashk-e-nadāmat nahīñ paidā karte

pahlī hī baar kahāñ ghaas harī aatī hai

sochtā huuñ ki kise dekhūñ kise na dekhūñ

niiñd āñkhoñ pe ka.ī ḳhvāb dharī aatī hai

ishq kī aag pe ye tel chhiḌaktī hai miyāñ

ḳhushk āñkhoñ se jo ashkoñ kī laḌī aatī hai

ashk jo chāñd ke chehre pe bhī girte haiñ kabhī

zindagī ek tasavvur se jilā paatī hai

ḳhushk mausam kā jo ik baar kiyā thā shikva

tab se milne mujhe har saal murrē aatī hai

pahle ik umr paristān kī galiyāñ nāpīñ

phir mire haath meñ jaadū kī chhaḌī aatī hai

ho to saktī hai mayassar mujhe ḳhil.at 'mūsā'

kyā karūñ biich meñ daryūza-garī aatī hai

ek do ashk-e-nadamat nahin paida karte

pahli hi bar kahan ghas hari aati hai

sochta hun ki kise dekhun kise na dekhun

nind aankhon pe kai KHwab dhari aati hai

ishq ki aag pe ye tel chhiDakti hai miyan

KHushk aankhon se jo ashkon ki laDi aati hai

ashk jo chand ke chehre pe bhi girte hain kabhi

zindagi ek tasawwur se jila pati hai

KHushk mausam ka jo ek bar kiya tha shikwa

tab se milne mujhe har sal murree aati hai

pahle ek umr paristan ki galiyan napin

phir mere hath mein jadu ki chhaDi aati hai

ho to sakti hai mayassar mujhe KHilat 'musa'

kya karun bich mein daryuza-gari aati hai