ek hi bar mein KHwabon se kinara kar ke

ek hī baar meñ ḳhvāboñ se kināra kar ke

bujh ga.ī diid shab-e-vasl nazāra kar ke

juz tire aur tarīqe bhī nikal sakte the

ham ne dekhā hī nahīñ ḳhud ko dobāra kar ke

ham to bas bolne vaale the sabhī kuchh sach sach

tum ne achchhā hī kiyā chup kā ishāra kar ke

ham to sadiyoñ se isī taur basar karte haiñ

tum bhī kuchh roz yahāñ dekho guzārā kar ke

ḳhud ko sauñpā thā tumheñ ham ko tumhārā karne

tum ne lauTāyā hameñ ham ko hamārā kar ke

karte rahte haiñ jo har-vaqt tumhārā charchā

ḳhud ko chhoḌeñge kisī roz tumhārā kar ke

ab ye dariyā ye talātum ye safīna kyā hai

ham to sab bhuul ga.e tum ko sahārā kar ke

ek hi bar mein KHwabon se kinara kar ke

bujh gai did shab-e-wasl nazara kar ke

juz tere aur tariqe bhi nikal sakte the

hum ne dekha hi nahin KHud ko dobara kar ke

hum to bas bolne wale the sabhi kuchh sach sach

tum ne achchha hi kiya chup ka ishaara kar ke

hum to sadiyon se isi taur basar karte hain

tum bhi kuchh roz yahan dekho guzara kar ke

KHud ko saunpa tha tumhein hum ko tumhaara karne

tum ne lauTaya hamein hum ko hamara kar ke

karte rahte hain jo har-waqt tumhaara charcha

KHud ko chhoDenge kisi roz tumhaara kar ke

ab ye dariya ye talatum ye safina kya hai

hum to sab bhul gae tum ko sahaara kar ke