ek jalwa ba-sad andaz-e-nazar dekh liya

ek jalva ba-sad andāz-e-nazar dekh liyā

tujh ko hī dekhā kiye tujh ko agar dekh liyā

jaise sar phoḌ ke mil jā.egī zindāñ se najāt

kyā junūñ ne koī dīvār meñ dar dekh liyā

baaz hai aaj talak dīda-e-hairāñ kī tarah

dasht-e-vahshat ne kise ḳhāk-basar dekh liyā

jurm-e-nazzāra kī paatā hai sazā dil ab tak

ahl-e-dil dekh liyā ahl-e-nazar dekh liyā

sūrat-e-naqsh-e-qadam dīda-e-mushtāq haiñ ham

jab bhī vo aayā sar-e-rāhguzar dekh liyā

yahī hasrat hai ki vo ek nazar dekh to le

aur us ne kabhī is samt agar dekh liyā

kahīñ parda hai tajallī kahīñ jalva hai hijāb

ye tamāshā bhī tirā zauq-e-nazar dekh liyā

roz ik taaza ġham-e-dahr hai nāzil 'tābish'

ek tūfān-e-balā ne mirā ghar dekh liyā

ek jalwa ba-sad andaz-e-nazar dekh liya

tujh ko hi dekha kiye tujh ko agar dekh liya

jaise sar phoD ke mil jaegi zindan se najat

kya junun ne koi diwar mein dar dekh liya

baz hai aaj talak dida-e-hairan ki tarah

dasht-e-wahshat ne kise KHak-basar dekh liya

jurm-e-nazzara ki pata hai saza dil ab tak

ahl-e-dil dekh liya ahl-e-nazar dekh liya

surat-e-naqsh-e-qadam dida-e-mushtaq hain hum

jab bhi wo aaya sar-e-rahguzar dekh liya

yahi hasrat hai ki wo ek nazar dekh to le

aur us ne kabhi is samt agar dekh liya

kahin parda hai tajalli kahin jalwa hai hijab

ye tamasha bhi tera zauq-e-nazar dekh liya

roz ek taza gham-e-dahr hai nazil 'tabish'

ek tufan-e-bala ne mera ghar dekh liya