ek masum tamanna ki faza thi kal tak

ek ma.asūm tamannā kī fazā thī kal tak

zindagī aisī kahāñ hosh-rubā thī kal tak

ġhaiz āñdhī kā banā ab hai muqaddar merā

dil ke āñgan meñ mahaktī sī sabā thī kal tak

naġhmagī aa ga.ī kis taur se us ke lab par

jis kī āvāz tarannum se judā thī kal tak

aaj ḳhāmosh bahut bazm-e-bahārāñ kyuuñ hai

gungunāte se libāde meñ havā thī kal tak

husn kī shoḳh-nazar māñge hai qīmat apnī

jhuktī āñkhoñ ke darīche meñ hayā thī kal tak

ye jo hañgāmoñ se marbūt hai mahfil merī

kaif-zā dil-rubā bulbul kī sadā thī kal tak

sar-nigūñ vaqt ke qadmoñ meñ hai ḳhvāhish apnī

varna har saañs meñ ik mauj-e-anā thī kal tak

ab kahāñ shauq ko miltā hai baḌhāvā 'ja.afar'

narm palkoñ meñ ghulī ek adā thī kal tak

ek masum tamanna ki faza thi kal tak

zindagi aisi kahan hosh-ruba thi kal tak

ghaiz aandhi ka bana ab hai muqaddar mera

dil ke aangan mein mahakti si saba thi kal tak

naghmagi aa gai kis taur se us ke lab par

jis ki aawaz tarannum se juda thi kal tak

aaj KHamosh bahut bazm-e-bahaaran kyun hai

gungunate se libaade mein hawa thi kal tak

husn ki shoKH-nazar mange hai qimat apni

jhukti aankhon ke dariche mein haya thi kal tak

ye jo hangamon se marbut hai mahfil meri

kaif-za dil-ruba bulbul ki sada thi kal tak

sar-nigun waqt ke qadmon mein hai KHwahish apni

warna har sans mein ek mauj-e-ana thi kal tak

ab kahan shauq ko milta hai baDhawa 'jafar'

narm palkon mein ghuli ek ada thi kal tak