ek mafruza taqaddus KHud pe tari kar raha hun

ek mafrūza taqaddus ḳhud pe taarī kar rahā huuñ

koh-e-isyāñ se bahishtī nahr jaarī kar rahā huuñ

chāhtā huuñ arsh-o-kursī tak pahuñchnā rafta rafta

asfalenī ḳhvāhishoñ par yuuñ savārī kar rahā huuñ

munhamik hai pairahan shaġhlī meñ kyuuñ chashm-e-taḳhayyul

maiñ abhī uryāñ badan par dast-kārī kar rahā huuñ

nafs-e-taskīnī pe us ne sau taqāze rakh diye haiñ

maiñ jo har lazzat pe fikr-e-hamd-e-bārī kar rahā huuñ

sar-nigūñ guzrā hai shāyad ab ke talvāroñ kā mausam

be-irāda shahr kī mardum-shumārī kar rahā huuñ

ek mafruza taqaddus KHud pe tari kar raha hun

koh-e-isyan se bahishti nahr jari kar raha hun

chahta hun arsh-o-kursi tak pahunchna rafta rafta

asfaleni KHwahishon par yun sawari kar raha hun

munhamik hai pairahan shaghli mein kyun chashm-e-taKHayyul

main abhi uryan badan par dast-kari kar raha hun

nafs-e-taskini pe us ne sau taqaze rakh diye hain

main jo har lazzat pe fikr-e-hamd-e-bari kar raha hun

sar-nigun guzra hai shayad ab ke talwaron ka mausam

be-irada shahr ki mardum-shumari kar raha hun