ek manzar mein kai bar use dekh ke dekh

ek manzar meñ ka.ī baar use dekh ke dekh

dekhnā hai to lagātār use dekh ke dekh

koī sūraj se milā paatā hai kab tak āñkheñ

phir bhī ik baar lagātār use dekh ke dekh

ye khulī aañkh kā manzar hī nahīñ hai mirī jaañ

band āñkhoñ se bhī ik baar use dekh ke dekh

barf āñkhoñ meñ liye duur khaḌe shaḳhs kī ḳhair

kaise jalne lage ruḳhsār use dekh ke dekh

koī dālān se jugnū na idhar aa nikle

ḳhvāb ho jaa.eñ na bedār use dekh ke dekh

dekhte dekhte kyā kuchh nazar aane lag jaa.e

ā.īna-ḳhāne ke us paar use dekh ke dekh

hai yaqīñ chaal sitāroñ kī badal jā.egī

ek din sub.h kā aḳhbār use dekh ke dekh

lab haiñ jis naam kī tasbīh use sun ke tū sun

aañkh jis kī hai talabgār use dekh ke dekh

gard tanhā.ī kī ab chhoḌ uḌānā 'sīmā'

jheñpte haiñ dar-o-dīvār use dekh ke dekh

ek manzar mein kai bar use dekh ke dekh

dekhna hai to lagatar use dekh ke dekh

koi suraj se mila pata hai kab tak aankhen

phir bhi ek bar lagatar use dekh ke dekh

ye khuli aankh ka manzar hi nahin hai meri jaan

band aankhon se bhi ek bar use dekh ke dekh

barf aankhon mein liye dur khaDe shaKHs ki KHair

kaise jalne lage ruKHsar use dekh ke dekh

koi dalan se jugnu na idhar aa nikle

KHwab ho jaen na bedar use dekh ke dekh

dekhte dekhte kya kuchh nazar aane lag jae

aaina-KHane ke us par use dekh ke dekh

hai yaqin chaal sitaron ki badal jaegi

ek din subh ka aKHbar use dekh ke dekh

lab hain jis nam ki tasbih use sun ke tu sun

aankh jis ki hai talabgar use dekh ke dekh

gard tanhai ki ab chhoD uDana 'sima'

jhenpte hain dar-o-diwar use dekh ke dekh