ek muddat se muskuraya nahin

ek muddat se muskurāyā nahīñ

dil ne taaza fareb khāyā nahīñ

un ko paane kā ḳhvāb dekhā thā

tab se apnā pata bhī paayā nahīñ

bazm-e-hastī sajī rahī lekin

jis kā thā intizār aaya nahīñ

sar pe girte rahe pahāḌ magar

mere jazboñ ne sar jhukāyā nahīñ

faḳhr-e-ādam na ho sakā jis ne

ḳhaak ho kar uruuj paayā nahīñ

zindagī kī hai shaam hone ko

dil ne phir bhī use bhulāyā nahīñ

umr sach kī sanad nahīñ hotī

ibn-e-mariyam ne kyā dikhāyā nahīñ

mujh ko ḳhud se jo āshnā kar de

aa.ina is adā kā paayā nahīñ

vaqt rahtā nahīñ sadā yaksāñ

kaun sā gul ḳhizāñ ne khāyā nahīñ

baiTh rahnā muhāl kar ke kahā

ham ne mahfil se to uThāyā nahīñ

dhuñdle dhuñdle the manziloñ ke nishāñ

phir bhī rāhoñ meñ Dagmagāyā nahīñ

jin meñ uḌtā thā ḳhvāb 'shāhīñ' kā

un fazāoñ ne āzmāyā nahīñ

ek muddat se muskuraya nahin

dil ne taza fareb khaya nahin

un ko pane ka KHwab dekha tha

tab se apna pata bhi paya nahin

bazm-e-hasti saji rahi lekin

jis ka tha intizar aaya nahin

sar pe girte rahe pahaD magar

mere jazbon ne sar jhukaya nahin

faKHr-e-adam na ho saka jis ne

KHak ho kar uruj paya nahin

zindagi ki hai sham hone ko

dil ne phir bhi use bhulaya nahin

umr sach ki sanad nahin hoti

ibn-e-mariyam ne kya dikhaya nahin

mujh ko KHud se jo aashna kar de

aaina is ada ka paya nahin

waqt rahta nahin sada yaksan

kaun sa gul KHizan ne khaya nahin

baiTh rahna muhaal kar ke kaha

hum ne mahfil se to uThaya nahin

dhundle dhundle the manzilon ke nishan

phir bhi rahon mein Dagmagaya nahin

jin mein uDta tha KHwab 'shahin' ka

un fazaon ne aazmaya nahin