ek rauzan ke abhi kirdar mein hun main

ek rauzan ke abhī kirdār meñ huuñ maiñ

ġhaur se dekho isī dīvār meñ huuñ maiñ

sab manāzir zard se paḌne lage haiñ yā

be-yaqīnī ke isī āzār meñ huuñ maiñ

TuuT jaa.e āsmāñ dhartī bhī phaT jaa.e

kyā mujhe parvā ki bazm-e-yār meñ huuñ maiñ

zehn meñ aulād hai aur ghar kī jānib huuñ

ruk nahīñ saktā abhī raftār meñ huuñ maiñ

ghar kī har shai kyuuñ mujhe be-nūr lagtī hai

kyā ziyāda aaj kal bāzār meñ huuñ maiñ

shohratoñ kā āḳhirī chāra jarā.em the

dekhiye ab kis qadar aḳhbār meñ huuñ maiñ

guftugū se kab mujhe parhez hai 'saurabh'

boltā suntā magar ash.ār meñ huuñ maiñ

ek rauzan ke abhi kirdar mein hun main

ghaur se dekho isi diwar mein hun main

sab manazir zard se paDne lage hain ya

be-yaqini ke isi aazar mein hun main

TuT jae aasman dharti bhi phaT jae

kya mujhe parwa ki bazm-e-yar mein hun main

zehn mein aulad hai aur ghar ki jaanib hun

ruk nahin sakta abhi raftar mein hun main

ghar ki har shai kyun mujhe be-nur lagti hai

kya ziyaada aaj kal bazar mein hun main

shohraton ka aaKHiri chaara jaraem the

dekhiye ab kis qadar aKHbar mein hun main

guftugu se kab mujhe parhez hai 'saurabh'

bolta sunta magar ashaar mein hun main