ek rishta bana raha hai mujhe

ek rishta banā rahā hai mujhe

ek rishta miTā rahā hai mujhe

ye diyā chup nahīñ rahā shab bhar

ik kahānī sunā rahā hai mujhe

ab mujhe kiil se laTaknā hai

panting sī banā rahā hai mujhe

ashk āñkhoñ meñ ret sāñsoñ meñ

ishq kyā kyā sikhā rahā hai mujhe

aag kā raag hai ise mat chheḌ

be-ḳhabar kyoñ jalā rahā hai mujhe

lok dhun jaisī kho ga.ī thī maiñ

jaane ab kaun gā rahā hai mujhe

saare dukh sukh ulajh ga.e āḳhir

vaqt sab kuchh bhulā rahā hai mujhe

aag hī aag kā izāla thī

vaqt kundan banā rahā hai mujhe

maiñ nahīñ jāntī burā yā bhalā

kuchh na kuchh yaad aa rahā hai mujhe

har taraf ik pukār suntī huuñ

koī apnā bulā rahā hai mujhe

ek dariyā jo ulTā bahtā hai

saath apne bahā rahā hai mujhe

jaise maiñ ret kā gharauñdā thī

toḌ kar phir banā rahā hai mujhe

bāñdh kar merī donoñ āñkhoñ ko

koī manzar dikhā rahā hai mujhe

mere par kāTne ke baad 'sahar'

ghoñsle se girā rahā hai mujhe

ek rishta bana raha hai mujhe

ek rishta miTa raha hai mujhe

ye diya chup nahin raha shab bhar

ek kahani suna raha hai mujhe

ab mujhe kil se laTakna hai

panting si bana raha hai mujhe

ashk aankhon mein ret sanson mein

ishq kya kya sikha raha hai mujhe

aag ka rag hai ise mat chheD

be-KHabar kyon jala raha hai mujhe

lok dhun jaisi kho gai thi main

jaane ab kaun ga raha hai mujhe

sare dukh sukh ulajh gae aaKHir

waqt sab kuchh bhula raha hai mujhe

aag hi aag ka izala thi

waqt kundan bana raha hai mujhe

main nahin jaanti bura ya bhala

kuchh na kuchh yaad aa raha hai mujhe

har taraf ek pukar sunti hun

koi apna bula raha hai mujhe

ek dariya jo ulTa bahta hai

sath apne baha raha hai mujhe

jaise main ret ka gharaunda thi

toD kar phir bana raha hai mujhe

bandh kar meri donon aankhon ko

koi manzar dikha raha hai mujhe

mere par kaTne ke baad 'sahar'

ghonsle se gira raha hai mujhe