ek tamasha aur dikhaya ja sakta tha

ek tamāshā aur dikhāyā jā saktā thā

mujh ko zinda bhī dafnāyā jā saktā thā

chiḌiyoñ kī āvāz na kānoñ tak aa saktī

ghar meñ itnā shor machāyā jā saktā thā

jab tak barf pighaltī yā barkhā rut aatī

dariyā aur bhī kaam meñ laayā jā saktā thā

tum ne apnā rasta ḳhud rokā thā varna

tum jab aanā chāhte aayā jā saktā thā

chhoTī chhoTī ḳhushiyāñ bāñTī jā saktī thiiñ

hañste hañste ġham apnāyā jā saktā thā

kitnā hī masrūf thā phir bhī apnī ḳhātir

thoḌā sā to vaqt bachāyā jā saktā thā

jitne vaqt meñ tum ne ghar ābād kiyā hai

utne vaqt meñ shahr basāyā jā saktā thā

gardan meñ bal aanā hī thā phir bhī 'saifī'

bojh zarā sā aur uThāyā jā saktā thā

ek tamasha aur dikhaya ja sakta tha

mujh ko zinda bhi dafnaya ja sakta tha

chiDiyon ki aawaz na kanon tak aa sakti

ghar mein itna shor machaya ja sakta tha

jab tak barf pighalti ya barkha rut aati

dariya aur bhi kaam mein laya ja sakta tha

tum ne apna rasta KHud roka tha warna

tum jab aana chahte aaya ja sakta tha

chhoTi chhoTi KHushiyan banTi ja sakti thin

hanste hanste gham apnaya ja sakta tha

kitna hi masruf tha phir bhi apni KHatir

thoDa sa to waqt bachaya ja sakta tha

jitne waqt mein tum ne ghar aabaad kiya hai

utne waqt mein shahr basaya ja sakta tha

gardan mein bal aana hi tha phir bhi 'saifi'

bojh zara sa aur uThaya ja sakta tha