ek tamanna aisi jo darkar nahin

ek tamannā aisī jo darkār nahīñ

ek pahelī hai jo pur-asrār nahīñ

kahīñ pe ghar ḳhālī hai koī log nahīñ

kahīñ pe log bahut haiñ par dīvār nahīñ

terā us ko chhoḌ ke jiinā aisā hai

ek kahānī puurī hai kirdār nahīñ

milne kī ummīd kahīñ par rakkhī hai

bojh kisī ke hijr kā hai jo baar nahīñ

ek suhūlat hāsil ho jaa.e mujh ko

us kī ḳhātir lekin maiñ tayyār nahīñ

bhaav nahīñ mālūm ki kis kā kitnā hai

maiñ be-mol to huuñ lekin be-kār nahīñ

ham-āhañg bhī hote haiñ par duniyā meñ

tere mere jaisī kuchh takrār nahīñ

kam hai lekin achchhā ḳhāsā likkhā hai

sher kā matlab sher hai ab ambār nahīñ

ek tamanna aisi jo darkar nahin

ek paheli hai jo pur-asrar nahin

kahin pe ghar KHali hai koi log nahin

kahin pe log bahut hain par diwar nahin

tera us ko chhoD ke jina aisa hai

ek kahani puri hai kirdar nahin

milne ki ummid kahin par rakkhi hai

bojh kisi ke hijr ka hai jo bar nahin

ek suhulat hasil ho jae mujh ko

us ki KHatir lekin main tayyar nahin

bhaw nahin malum ki kis ka kitna hai

main be-mol to hun lekin be-kar nahin

ham-ahang bhi hote hain par duniya mein

tere mere jaisi kuchh takrar nahin

kam hai lekin achchha KHasa likkha hai

sher ka matlab sher hai ab ambar nahin