ek-tarfa be-KHudi mein gum hua rahta hun main

ek-tarfa be-ḳhudī meñ gum huā rahtā huuñ maiñ

be-mahābā fāsloñ ko nāptā rahtā huuñ maiñ

mere ḳhad-o-ḳhāl ko pahchānñā āsāñ nahīñ

rāste kī gard meñ aksar aTā rahtā huuñ maiñ

jāntā huuñ DhūñDhtā huuñ ik sarāb-e-nūr ko

phir bhī us kī khoj meñ paiham lagā rahtā huuñ maiñ

kārvān-e-shauq jis ko zindagī kahte ho tum

is tag-o-dau ke jilau meñ hī sadā rahtā huuñ maiñ

hazrat-e-vā'iz tujhe merā pata kyūñkar mile

jism ke kā'be meñ mānind-e-ḳhudā rahtā huuñ maiñ

ek-tarfa be-KHudi mein gum hua rahta hun main

be-mahaba faslon ko napta rahta hun main

mere KHad-o-KHal ko pahchanna aasan nahin

raste ki gard mein aksar aTa rahta hun main

jaanta hun DhunDhta hun ek sarab-e-nur ko

phir bhi us ki khoj mein paiham laga rahta hun main

karwan-e-shauq jis ko zindagi kahte ho tum

is tag-o-dau ke jilau mein hi sada rahta hun main

hazrat-e-wa'iz tujhe mera pata kyunkar mile

jism ke ka'be mein manind-e-KHuda rahta hun main