faqa-masti mein bhi jine ki ada le jaenge

fāqa-mastī meñ bhī jiine kī adā le jā.eñge

ye luTere mere ghar se aur kyā le jā.eñge

dandanāte phir rahe haiñ zāfrānī bheḌiye

ghar ke andar ghus ke bachchoñ ko uThā le jā.eñge

aadmī kā jism hogā aur sar iblīs kā

pāThshālāoñ meñ kaale saañp paale jā.eñge

un kā maqsad hai ḳhudā se har vasīla kaaT deñ

haath se qur.ān hoñToñ se duā le jā.eñge

zarra-zarra laal kar deñge hamāre ḳhuun se

aur hamīñ se ye sitamgar ḳhūñ-bahā le jā.eñge

vo miTā deñge hamārī azmatoñ kā har nishāñ

chāñd-tāroñ se hamārā naqsh-e-pā le jā.eñge

tishnagī hogī jahāñ be-sāḳhta nauha-kunāñ

us jagah ham dāstān-e-karbalā le jā.eñge

ḳhūñ-chakāñ tārīḳh dohrā.egī apne aap ko

mai-kade se shaiḳh jī phir se nikāle jā.eñge

kab talak yūñhī duāoñ par rahegā inhisār

kab talak sar yūñhī nezoñ par uchhāle jā.eñge

pārsā ham-rāh le jā.eñge pindār-e-amal

ham to apne saath un kī ḳhāk-e-pā le jā.eñge

lauT kar jaane na pā.eñge ye zālim ḳhālī haath

kuchh nahīñ to saath apne bad-duā le jā.eñge

faqa-masti mein bhi jine ki ada le jaenge

ye luTere mere ghar se aur kya le jaenge

dandanate phir rahe hain zafrani bheDiye

ghar ke andar ghus ke bachchon ko uTha le jaenge

aadmi ka jism hoga aur sar iblis ka

paThshaalaon mein kale sanp pale jaenge

un ka maqsad hai KHuda se har wasila kaT den

hath se quran honTon se dua le jaenge

zarra-zarra lal kar denge hamare KHun se

aur hamin se ye sitamgar KHun-baha le jaenge

wo miTa denge hamari azmaton ka har nishan

chand-taron se hamara naqsh-e-pa le jaenge

tishnagi hogi jahan be-saKHta nauha-kunan

us jagah hum dastan-e-karbala le jaenge

KHun-chakan tariKH dohraegi apne aap ko

mai-kade se shaiKH ji phir se nikale jaenge

kab talak yunhi duaon par rahega inhisar

kab talak sar yunhi nezon par uchhaale jaenge

parsa ham-rah le jaenge pindar-e-amal

hum to apne sath un ki KHak-e-pa le jaenge

lauT kar jaane na paenge ye zalim KHali hath

kuchh nahin to sath apne bad-dua le jaenge