fasiq jo agar aashiq-e-diwana hua to kya

fāsiq jo agar āshiq-e-dīvāna huā to kyā

duniyā ke matālib ko farzāna huā to kyā

ġhaflat meñ koī paḌ kar gar umr ko kho Daale

ba.ad is ke agar samjhā phir syānā huā to kyā

ye umr ġhanīmat hai jo dam ki guzartā hai

gar ḳhāna huā to kyā vīrāna huā to kyā

nazzāra to kar ai dil ho shaan meñ dilbar kā

gar bhūkā jo Tal jaave phir khānā huā to kyā

de jaam talattuf se saaqī ba-lab-e-tishna

dil pyaas se jab kumlā paimāna huā to kyā

hai kaam sute matlab bar aave kisī Dhab se

ka.aba jo huā to kyā but-ḳhāna huā to kyā

jo mard-e-yagāna hai nafs apne se laḌtā hai

gar aur tarah koī mardāna huā to kyā

uljhā hai ye dil pyāre zulf apnī ko suljhāve

jab mar ga.e jaanī ham phir shāna huā to kyā

mukhḌe kī jhamak sājan Tuk ham ko bhī dikhlāo

gar aage raqīboñ ke jhamkāna huā to kyā

gar sair mayassar ho tujh husn ke bāġhistāñ

ba.ad is ke agar mujh ko mar jaanā huā to kyā

dil apne begāne se kuchh ham ne na phal paayā

gar apnā huā to kyā begāna huā to kyā

kahtā thā maiñ is dil ko āshiq to nahīñ honā

ab bas ke agar samjhā pachhtānā huā to kyā

mastāna hamesha raho ai āshiq-e-'afrīdī'

be-ishq agar koī mardāna huā to kyā

fasiq jo agar aashiq-e-diwana hua to kya

duniya ke matalib ko farzana hua to kya

ghaflat mein koi paD kar gar umr ko kho Dale

baad is ke agar samjha phir syana hua to kya

ye umr ghanimat hai jo dam ki guzarta hai

gar KHana hua to kya virana hua to kya

nazzara to kar ai dil ho shan mein dilbar ka

gar bhuka jo Tal jawe phir khana hua to kya

de jam talattuf se saqi ba-lab-e-tishna

dil pyas se jab kumla paimana hua to kya

hai kaam sute matlab bar aawe kisi Dhab se

kaba jo hua to kya but-KHana hua to kya

jo mard-e-yagana hai nafs apne se laDta hai

gar aur tarah koi mardana hua to kya

uljha hai ye dil pyare zulf apni ko suljhawe

jab mar gae jaani hum phir shana hua to kya

mukhDe ki jhamak sajan Tuk hum ko bhi dikhlao

gar aage raqibon ke jhamkana hua to kya

gar sair mayassar ho tujh husn ke baghistan

baad is ke agar mujh ko mar jaana hua to kya

dil apne begane se kuchh hum ne na phal paya

gar apna hua to kya begana hua to kya

kahta tha main is dil ko aashiq to nahin hona

ab bas ke agar samjha pachhtana hua to kya

mastana hamesha raho ai aashiq-e-'afridi'

be-ishq agar koi mardana hua to kya