fahmida hai jo tujhko to fahmid se nikal

fahmīda hai jo tujh ko to fahmīd se nikal

aur diid kā jo shauq hai to diid se nikal

zindān-e-hijr meñ hameñ sauñpā thā ishq ne

aa.e haiñ ham nasīboñ kī tā.īd se nikal

qālib meñ mere yaaro bhalā kyā samāvī dam

jab jaan ko kahe koī tākīd se nikal

tashbīb meñ bhī lutf hai ik ai qasīda-go

itnā shitāb bhī tū na tamhīd se nikal

misre ko pahuñche misra-e-sānī burā hai kyā

kar le nikāh ālam-e-tajrīd se nikal

kar tū uyūb-e-nazm se parhez ai fulāñ

shā.er hai to tanāfur o tāqīd se nikal

haiñ yaad kab ai mirī vahshat ke rañg-Dhañg

majnūñ gayā hai dasht ko taqlīd se nikal

vo mast maiñ nahīñ huuñ ki mastoñ kī khā ke dhuul

jā.ūñ sharāb-ḳhāna-e-tauhīd se nikal

ho 'mus.hafī' tū ilm-e-ilāhī kā āshnā

qaid-e-anāsir aur mavālīd se nikal

fahmida hai jo tujh ko to fahmid se nikal

aur did ka jo shauq hai to did se nikal

zindan-e-hijr mein hamein saunpa tha ishq ne

aae hain hum nasibon ki taid se nikal

qalib mein mere yaro bhala kya samawi dam

jab jaan ko kahe koi takid se nikal

tashbib mein bhi lutf hai ek ai qasida-go

itna shitab bhi tu na tamhid se nikal

misre ko pahunche misra-e-sani bura hai kya

kar le nikah aalam-e-tajrid se nikal

kar tu uyub-e-nazm se parhez ai fulan

shaer hai to tanafur o taqid se nikal

hain yaad kab ai meri wahshat ke rang-Dhang

majnun gaya hai dasht ko taqlid se nikal

wo mast main nahin hun ki maston ki kha ke dhul

jaun sharab-KHana-e-tauhid se nikal

ho 'mushafi' tu ilm-e-ilahi ka aashna

qaid-e-anasir aur mawalid se nikal