faisla hi ghalat kiya maine

faisla hī ġhalat kiyā maiñ ne

ḳhud tirā hijr chun liyā maiñ ne

koī shikva gila kiyā maiñ ne

jo diyā tū ne rakh liyā maiñ ne

jab bhī yaad aa.e dard ke panchhī

ik parinda rihā kiyā maiñ ne

kis qadar dekh jazb huuñ tujh meñ

tū ne sochā to sun liyā maiñ ne

phir udheḌūñgī dard ke sweater

ḳhvāb hī aisā bun liyā maiñ ne

chashm-e-bīnā pe hai asar tirā

aks āñkhoñ meñ bhar liyā maiñ ne

ab tasallī se baat karte haiñ

ḳhvāhishoñ ko sulā diyā maiñ ne

ab na terī sunūñgī maiñ 'tārā'

terā ab tak kahā kiyā maiñ ne

faisla hi ghalat kiya main ne

KHud tera hijr chun liya main ne

koi shikwa gila kiya main ne

jo diya tu ne rakh liya main ne

jab bhi yaad aae dard ke panchhi

ek parinda riha kiya main ne

kis qadar dekh jazb hun tujh mein

tu ne socha to sun liya main ne

phir udheDungi dard ke sweater

KHwab hi aisa bun liya main ne

chashm-e-bina pe hai asar tera

aks aankhon mein bhar liya main ne

ab tasalli se baat karte hain

KHwahishon ko sula diya main ne

ab na teri sunungi main 'tara'

tera ab tak kaha kiya main ne