faisla koi mere haq mein hua hai shayad

faisla koī mire haq meñ huā hai shāyad

mausam-e-gul mire āñgan meñ rukā hai shāyad

muddatoñ ba.ad kiyā rābta us ne to lagā

us ko ehsās-e-peshemānī huā hai shāyad

aao ik baar kitāboñ ko khañgālā jaa.e

phuul jo us ne diyā thā vo rakhā hai shāyad

naġhma-zan tār-e-nafas meñ haiñ usī kī yādeñ

dhaḌkanoñ meñ bhī vahī bol rahā hai shāyad

us se pahle sā ravābit meñ tasalsul na rahā

darmiyāñ donoñ ke ab koī ḳhalā hai shāyad

vaqt-e-ruḳhsat bhī na chehre pe shikan thī us ke

saaf zāhir thā vo kuchh soch chukā hai shāyad

ratjage karvaTeñ bechainī udāsī uljhan

us kī yādoñ kā varaq koī khulā hai shāyad

muztarib kitne hī sajde haiñ jabīñ par merī

ma.abad-e-ishq meñ vo jalva-numā hai shāyad

vādī-e-jism burūdat se dahak uThī hai

fasl-e-bārāñ kī havāoñ ne chhuā hai shāyad

bārhā mushkileñ ho jaatī haiñ āsāñ 'amabar'

tere haq meñ bhī kisī lab pe duā hai shāyad

faisla koi mere haq mein hua hai shayad

mausam-e-gul mere aangan mein ruka hai shayad

muddaton baad kiya rabta us ne to laga

us ko ehsas-e-peshemani hua hai shayad

aao ek bar kitabon ko khangala jae

phul jo us ne diya tha wo rakha hai shayad

naghma-zan tar-e-nafas mein hain usi ki yaaden

dhaDkanon mein bhi wahi bol raha hai shayad

us se pahle sa rawabit mein tasalsul na raha

darmiyan donon ke ab koi KHala hai shayad

waqt-e-ruKHsat bhi na chehre pe shikan thi us ke

saf zahir tha wo kuchh soch chuka hai shayad

ratjage karwaTen bechaini udasi uljhan

us ki yaadon ka waraq koi khula hai shayad

muztarib kitne hi sajde hain jabin par meri

mabad-e-ishq mein wo jalwa-numa hai shayad

wadi-e-jism burudat se dahak uThi hai

fasl-e-baran ki hawaon ne chhua hai shayad

barha mushkilen ho jati hain aasan 'amabar'

tere haq mein bhi kisi lab pe dua hai shayad