falak-nashin hain kabhi aazma ke dekha jae

falak-nashīñ haiñ kabhī aazmā ke dekhā jaa.e

sadā.eñ ham ko vahīñ se lagā ke dekhā jaa.e

vo sad-hijāb meñ rū-posh bhī nahīñ lekin

havas hai diid ko parda uThā ke dekhā jaa.e

har ik suḳhan pe satā.ish 'azāb lagtī hai

kabhī to ham ko nazar se girā ke dekhā jaa.e

vo phuul hai to use jaan tak karo mahsūs

vo chāñd hai to añdherā baḌhā ke dekhā jaa.e

agar vo 'ishq hai hañs kar pahāḌ uThā loge

agar hai bojh to sar se girā ke dekhā jaa.e

latāfat-e-ruḳh-e-zebā pe baar haiñ nazreñ

so shart ye hai ki palkeñ jhukā ke dekhā jaa.e

falak-nashin hain kabhi aazma ke dekha jae

sadaen hum ko wahin se laga ke dekha jae

wo sad-hijab mein ru-posh bhi nahin lekin

hawas hai did ko parda uTha ke dekha jae

har ek suKHan pe sataish 'azab lagti hai

kabhi to hum ko nazar se gira ke dekha jae

wo phul hai to use jaan tak karo mahsus

wo chand hai to andhera baDha ke dekha jae

agar wo 'ishq hai hans kar pahaD uTha loge

agar hai bojh to sar se gira ke dekha jae

latafat-e-ruKH-e-zeba pe bar hain nazren

so shart ye hai ki palken jhuka ke dekha jae