falak se toD ke laoge mah-o-anjum ko

falak se toḌ ke lāoge māh-o-anjum ko

kabhī tumhīñ ne kahā thā jo yaad ho tum ko

ḳhushī se Dūbeñge jab tum hī nāḳhudā Thahre

ḳhabar karo to zarā mauj aur talātum ko

ye kaisī bazm hai vīrān mai-kada kyoñ hai

nigāheñ DhūñDhtī rahtī haiñ bāda-o-ḳhum ko

jahez naam kī fikroñ se Dar ga.iiñ ḳhushiyāñ

dulhan tarastī hai be-fikr se tabassum ko

makāñ hai shīshe kā har vaqt sahmī rahtī huuñ

maiñ rok bhī nahīñ saktī havā-e-barham ko

sabhī to apne the par ghar jalā diyā kis ne

jhulaste sho'loñ ne ham ko jalā diyā tum ko

vo bazm-e-ġhair meñ andāz-e-be-ruḳhī 'satvat'

kabhī bhulā na sakī maiñ tire takallum ko

falak se toD ke laoge mah-o-anjum ko

kabhi tumhin ne kaha tha jo yaad ho tum ko

KHushi se Dubenge jab tum hi naKHuda Thahre

KHabar karo to zara mauj aur talatum ko

ye kaisi bazm hai viran mai-kada kyon hai

nigahen DhunDhti rahti hain baada-o-KHum ko

jahez nam ki fikron se Dar gain KHushiyan

dulhan tarasti hai be-fikr se tabassum ko

makan hai shishe ka har waqt sahmi rahti hun

main rok bhi nahin sakti hawa-e-barham ko

sabhi to apne the par ghar jala diya kis ne

jhulaste sho'lon ne hum ko jala diya tum ko

wo bazm-e-ghair mein andaz-e-be-ruKHi 'satwat'

kabhi bhula na saki main tere takallum ko