falak ye jaur-o-sitam mujhse na-tawan ke liye

falak ye jaur-o-sitam mujh se nā-tavāñ ke liye

maiñ hī thā kyā tire zulmoñ ke imtihāñ ke liye

dil āshiqoñ ke the pāmālī-e-butāñ ke liye

na jaur-e-ġhair-o-jafā-hā-e-āsmāñ ke liye

maiñ musta.id huuñ agar nāla-o-fuġhāñ ke liye

to kuchh se kuchh abhī ho jaa.e āsmāñ ke liye

phañsā ke yaar kī zulfoñ meñ ham ne dil dekho

ḳharīdī aur balā ek apnī jaañ ke liye

sitam hai fasl-e-bahārī meñ bāġhbāñ kā hukm

na ho.e baaġh meñ bulbul ko āshiyāñ kai liye

kahegā nāsehā kyā fā.ede kī tū mere

hue haiñ ḳhalq hī āshiq faqat ziyāñ kai liye

na ḳharch bā-ḳhudā umr-e-azīz apnī kar

milā nahīñ tujhe ye naqd rā.egāñ ke liye

yahāñ haiñ TukḌe jigar mah-vashoñ ke be-dekhe

ye baat kab hai mayassar bhalā katāñ ke liye

hamārā roknā achchhā nahiñ hai sun lenā

ek aur roz burā hogā pāsbāñ kai liye

na ho.e kyuuñ dar-e-asnām sajda-gah apnā

jabīñ banī hai butoñ hī ke āstāñ ke liye

basā hai dil ke mire qasr meñ tasavvur-e-yār

makīn thā ye sazā-vār is makāñ ke liye

sunā ke qissa-e-ġham apnā us ko apne hī

dil-o-jigar ne maze ġham kī dāstāñ ke liye

use to roz bahāne ko chāhiyeñ dariyā

kahāñ se lā.ūñ maiñ us chashm-e-ḳhūñfishāñ ke liye

nahīñ to bar-sar-e-har-mudda.ā hai sau sau baar

par ik zabān jo hiltī nahīñ so haañ kai liye

chhupā rahe na ruḳh-e-yār zulf meñ kyūñ-kar

taqayya farz hai momin ko hifz-e-jāñ ke liye

sunā jo mad.h bhī kiije to kiije aise kī

ki jis kī mad.h ho faḳhr ahl-e-āsmāñ ke liye

na ye ki har kas-o-nā-kas ke bhaaT jā.iye ban

pa.e-umīd-e-zar-e-naqd-o-hirs-e-nāñ ke liye

nahīñ hai mad.h kisī ke liye yahāñ zebā

jo hai to hai nabī-e-āḳhiruz-zamāñ ke liye

vo vo hai naam zabāñ par gar us kā aa jaave

to lazzat aur hī hāsil ho kām-o-jāñ ke liye

vo vo hai nām-e-ḳhudā dekho jis kā zarra-e-lutf

faroġh-baḳhsh hai is tīra-ḳhāk-dāñ ke liye

usī ke hai ruḳh-e-anvar se ye jahāñ raushan

usī se nuur hai ḳhurshīd-e-āsmāñ ke liye

vo kaun sarvar-e-ālam mohammad-e-arabī

ki jis kī zaat se hai faiz do-jahāñ ke liye

atā kiyā hai ḳhudā ne vo haañ use dil-o-dast

ki jis se pahuñche hai imdād bahr-o-kāñ ke liye

kalīd-e-qufl-e-dar-e-ārzū haiñ us kī bhaveñ

bilā-mubālaġha kahtā huuñ ins-o-jāñ ke liye

itā.at us kī zaḳhīra hai bas sa.ādat kā

yahāñ ke vāste aur mulk-e-jāvedāñ ke liye

vo jo zabān ki ho us kī mad.h se sākit

majāl-e-nutq na ho 'aish' us zabāñ ke liye

falak ye jaur-o-sitam mujh se na-tawan ke liye

main hi tha kya tere zulmon ke imtihan ke liye

dil aashiqon ke the pamali-e-butan ke liye

na jaur-e-ghair-o-jafa-ha-e-asman ke liye

main mustaid hun agar nala-o-fughan ke liye

to kuchh se kuchh abhi ho jae aasman ke liye

phansa ke yar ki zulfon mein hum ne dil dekho

KHaridi aur bala ek apni jaan ke liye

sitam hai fasl-e-bahaari mein baghban ka hukm

na hoe bagh mein bulbul ko aashiyan kai liye

kahega naseha kya faede ki tu mere

hue hain KHalq hi aashiq faqat ziyan kai liye

na KHarch ba-KHuda umr-e-aziz apni kar

mila nahin tujhe ye naqd raegan ke liye

yahan hain TukDe jigar mah-washon ke be-dekhe

ye baat kab hai mayassar bhala katan ke liye

hamara rokna achchha nahin hai sun lena

ek aur roz bura hoga pasban kai liye

na hoe kyun dar-e-asnam sajda-gah apna

jabin bani hai buton hi ke aastan ke liye

basa hai dil ke mere qasr mein tasawwur-e-yar

makin tha ye saza-war is makan ke liye

suna ke qissa-e-gham apna us ko apne hi

dil-o-jigar ne maze gham ki dastan ke liye

use to roz bahane ko chahiyen dariya

kahan se laun main us chashm-e-KHunfishan ke liye

nahin to bar-sar-e-har-muddaa hai sau sau bar

par ek zaban jo hilti nahin so han kai liye

chhupa rahe na ruKH-e-yar zulf mein kyun-kar

taqayya farz hai momin ko hifz-e-jaan ke liye

suna jo madh bhi kije to kije aise ki

ki jis ki madh ho faKHr ahl-e-asman ke liye

na ye ki har kas-o-na-kas ke bhaT jaiye ban

pae-umid-e-zar-e-naqd-o-hirs-e-nan ke liye

nahin hai madh kisi ke liye yahan zeba

jo hai to hai nabi-e-aKHiruz-zaman ke liye

wo wo hai nam zaban par gar us ka aa jawe

to lazzat aur hi hasil ho kaam-o-jaan ke liye

wo wo hai nam-e-KHuda dekho jis ka zarra-e-lutf

farogh-baKHsh hai is tira-KHak-dan ke liye

usi ke hai ruKH-e-anwar se ye jahan raushan

usi se nur hai KHurshid-e-asman ke liye

wo kaun sarwar-e-alam mohammad-e-arabi

ki jis ki zat se hai faiz do-jahan ke liye

ata kiya hai KHuda ne wo han use dil-o-dast

ki jis se pahunche hai imdad bahr-o-kan ke liye

kalid-e-qufl-e-dar-e-arzu hain us ki bhawen

bila-mubaalagha kahta hun ins-o-jaan ke liye

itaat us ki zaKHira hai bas saadat ka

yahan ke waste aur mulk-e-jawedan ke liye

wo jo zaban ki ho us ki madh se sakit

majal-e-nutq na ho 'aish' us zaban ke liye