falsafa yun zindagi ka hum ko samjhati hai dhup

falsafa yuuñ zindagī kā ham ko samjhātī hai dhuup

din nikaltā hai ki āñkhoñ meñ chalī aatī hai dhuup

āñsuoñ ne bādaloñ kī hī du'ā māñgī hai aaj

dekhnā hai mujh ko bhī kaise nikal aatī hai dhuup

maiñ to darvāze darīche band rakhtā huuñ magar

jaane kin rastoñ se ho kar ghar meñ aa jaatī hai dhuup

sard mausam kī kahānī zeb use aatī nahīñ

bām-e-shaukat se bahut ūñche utar aatī hai dhuup

peḌ sāya-dār sahrā meñ ugānā chāhiye

paañv meñ ho aable to ḳhvāb dikhlātī hai dhuup

sach usī sūrat se aatā hai hamāre sāmne

jaise bādal chiir kar dhartī pe aa jaatī hai dhuup

zehn-o-dil meñ jaane kyā jazbe ubharte haiñ 'shamīm'

ek aañsū kī tarah āñkhoñ se Dhal jaatī hai dhuup

falsafa yun zindagi ka hum ko samjhati hai dhup

din nikalta hai ki aankhon mein chali aati hai dhup

aansuon ne baadalon ki hi du'a mangi hai aaj

dekhna hai mujh ko bhi kaise nikal aati hai dhup

main to darwaze dariche band rakhta hun magar

jaane kin raston se ho kar ghar mein aa jati hai dhup

sard mausam ki kahani zeb use aati nahin

baam-e-shaukat se bahut unche utar aati hai dhup

peD saya-dar sahra mein ugana chahiye

panw mein ho aable to KHwab dikhlati hai dhup

sach usi surat se aata hai hamare samne

jaise baadal chir kar dharti pe aa jati hai dhup

zehn-o-dil mein jaane kya jazbe ubharte hain 'shamim'

ek aansu ki tarah aankhon se Dhal jati hai dhup