faqat lafzon se kyon phulon sitaron se ghazal likkhen

faqat lafzoñ se kyoñ phūloñ sitāroñ se ġhazal likkheñ

jo hañste haiñ sadā un ābshāroñ se ġhazal likkheñ

lab-e-dariyā idhar haiñ phuul aur us samt haiñ kāñTe

milā kar ḳhār-o-gul donoñ kināroñ se ġhazal likkheñ

har ik ehsās ko alfāz mil jaa.eñ ye nā-mumkin

zabāñ jo ban na paa.e un ishāroñ se ġhazal likkheñ

ḳhushī ne phuul barsā.e bahāreñ aa ga.iiñ lekin

abhī maġhmūm haiñ jo un nazāroñ se ġhazal likkheñ

lahū meñ Duub kar ubhre na.ī tahzīb ke manzar

guloñ ko chhoḌ kar ham sho'la-zāroñ se ġhazal likkheñ

judā hote hue sūraj ke ġham se āshnā ho kar

shafaq ke Dūbte rangīñ nazāroñ se ġhazal likkheñ

'shabānā' apnī kashtī hai abhī tūfāñ kī bāñhoñ meñ

jahāñ kashtī rukegī un kināroñ se ġhazal likkheñ

faqat lafzon se kyon phulon sitaron se ghazal likkhen

jo hanste hain sada un aabshaaron se ghazal likkhen

lab-e-dariya idhar hain phul aur us samt hain kanTe

mila kar KHar-o-gul donon kinaron se ghazal likkhen

har ek ehsas ko alfaz mil jaen ye na-mumkin

zaban jo ban na pae un ishaaron se ghazal likkhen

KHushi ne phul barsae bahaaren aa gain lekin

abhi maghmum hain jo un nazaron se ghazal likkhen

lahu mein Dub kar ubhre nai tahzib ke manzar

gulon ko chhoD kar hum sho'la-zaron se ghazal likkhen

juda hote hue suraj ke gham se aashna ho kar

shafaq ke Dubte rangin nazaron se ghazal likkhen

'shabana' apni kashti hai abhi tufan ki banhon mein

jahan kashti rukegi un kinaron se ghazal likkhen