faqat mehnat mashaqqat ka natija kam nikalta hai

faqat mehnat mashaqqat kā natīja kam nikaltā hai

duā jab maañ kī shāmil ho to phir zamzam nikaltā hai

kahīñ par bhī sambhalne kī ye mohlat hī nahīñ detā

kanār-e-vaqt se har hādsa ik dam nikaltā hai

mohabbat ke safar meñ jab kahīñ par moḌ aa jaa.e

sunā ye hai vahīñ se hijr kā mausam nikaltā hai

safar kā marhala jo ho jahāñ par likh diyā jaa.e

usī manzil pe aa kar zindagī kā dam nikaltā hai

bahut kamzor hotā hai kahīñ par ḳhuun kā rishta

kahīñ ik kāġhzī rishta hī mustahkam nikaltā hai

ye kaisī vādī-e-ġhurbat se vābasta hue ham log

jahāñ sardī meñ sūraj bhī bahut kam-kam nikaltā hai

faqat mehnat mashaqqat ka natija kam nikalta hai

dua jab man ki shamil ho to phir zamzam nikalta hai

kahin par bhi sambhalne ki ye mohlat hi nahin deta

kanar-e-waqt se har hadsa ek dam nikalta hai

mohabbat ke safar mein jab kahin par moD aa jae

suna ye hai wahin se hijr ka mausam nikalta hai

safar ka marhala jo ho jahan par likh diya jae

usi manzil pe aa kar zindagi ka dam nikalta hai

bahut kamzor hota hai kahin par KHun ka rishta

kahin ek kaghzi rishta hi mustahkam nikalta hai

ye kaisi wadi-e-ghurbat se wabasta hue hum log

jahan sardi mein suraj bhi bahut kam-kam nikalta hai