faqat mujhko to ek hi gham mohabbat haar baiTha hun

faqat mujh ko to ik hī ġham mohabbat haar baiThā huuñ

haiñ āñkheñ bhī zarā sī nam mohabbat haar baiThā huuñ

davā zaḳhm-e-mohabbat pe lagā mujh ko jo hai koī

mire zaḳhmoñ pe rakh marham mohabbat haar baiThā huuñ

judā.ī jaan kī dushman judā.ī dard aisā hai

rahūñ shāyad zarā ab kam mohabbat haar baiThā huuñ

ta'alluq TuuT bhī jaatā magar rahtā bharam baaqī

banā dushman mirā ham-dam mohabbat haar baiThā huuñ

baḌā hī zo'm thā mujh ko huuñ pyārā sab se maiñ us ko

mirā TuuTā yaqīñ mohkam mohabbat haar baiThā huuñ

mohabbat ko samajh paayā 'mudassir' maiñ faqat itnā

samajh aa.e jo pech-o-ḳham mohabbat haar baiThā huuñ

faqat mujh ko to ek hi gham mohabbat haar baiTha hun

hain aankhen bhi zara si nam mohabbat haar baiTha hun

dawa zaKHm-e-mohabbat pe laga mujh ko jo hai koi

mere zaKHmon pe rakh marham mohabbat haar baiTha hun

judai jaan ki dushman judai dard aisa hai

rahun shayad zara ab kam mohabbat haar baiTha hun

ta'alluq TuT bhi jata magar rahta bharam baqi

bana dushman mera ham-dam mohabbat haar baiTha hun

baDa hi zo'm tha mujh ko hun pyara sab se main us ko

mera TuTa yaqin mohkam mohabbat haar baiTha hun

mohabbat ko samajh paya 'mudassir' main faqat itna

samajh aae jo pech-o-KHam mohabbat haar baiTha hun