faqat qaziya yahi hai fann-e-tabi aur ilahi mein

faqat qaziya yahī hai fann-e-tab.ī aur ilāhī meñ

jo ilm-e-ma.arifat chāhe to rah yād-e-ilāhī meñ

samajhtā hai usī kā jalva-gah ġhaib-e-shahādat ko

nahīñ kuchh farq aarif ko safedī o siyāhī meñ

nahīñ ārām mujh ko iztirāb-e-dil se siine meñ

ki dariyā muztarib hotā hai betābī-e-māhī meñ

na kar mastoñ se kāvish har ghaḌī āmān kahtā huuñ

ḳhalal aa jā.egā zāhid tirī ismat-panāhī meñ

jagā kar ḳhvāb-e-āsā.ish se 'bedār' aah hastī meñ

adam-āsūdgāñ ko lā ke Daalā hai tabāhī meñ

jo kaifiyyat hai mastī se tirī āñkhoñ kī laalī meñ

nahīñ vo nashsha-e-rañgīñ sharāb-e-portugalī meñ

sar-o-barg-e-ḳhushī ai gul-badan tujh bin kahāñ mujh ko

gulistān-e-dil aayā fauj-e-ġham kī pā.emālī meñ

dur-e-dandāñ hue the maujzan kis bahr-e-ḳhūbī ke

ki motī sharm se paanī hue silk-e-la.ālī meñ

jahāñ vo shakkarīñ-lab guftugū meñ aave ai tuutī

suḳhan sarsabz terā kab ho vaañ shīrīñ-maqālī meñ

abas hai ārzū-e-ḳhush-dilī 'bedār' gardūñ se

mai-e-rāhat jo chāhe so kahāñ is jām-e-ḳhālī meñ

faqat qaziya yahi hai fann-e-tabi aur ilahi mein

jo ilm-e-marifat chahe to rah yaad-e-ilahi mein

samajhta hai usi ka jalwa-gah ghaib-e-shahadat ko

nahin kuchh farq aarif ko safedi o siyahi mein

nahin aaram mujh ko iztirab-e-dil se sine mein

ki dariya muztarib hota hai betabi-e-mahi mein

na kar maston se kawish har ghaDi aaman kahta hun

KHalal aa jaega zahid teri ismat-panahi mein

jaga kar KHwab-e-asaish se 'bedar' aah hasti mein

adam-asudgan ko la ke Dala hai tabahi mein

jo kaifiyyat hai masti se teri aankhon ki lali mein

nahin wo nashsha-e-rangin sharab-e-portugali mein

sar-o-barg-e-KHushi ai gul-badan tujh bin kahan mujh ko

gulistan-e-dil aaya fauj-e-gham ki paemali mein

dur-e-dandan hue the maujzan kis bahr-e-KHubi ke

ki moti sharm se pani hue silk-e-laali mein

jahan wo shakkarin-lab guftugu mein aawe ai tuti

suKHan sarsabz tera kab ho wan shirin-maqali mein

abas hai aarzu-e-KHush-dili 'bedar' gardun se

mai-e-rahat jo chahe so kahan is jam-e-KHali mein