faqiron ka chalan yun jism ke andar mahakta hai

faqīroñ kā chalan yuuñ jism ke andar mahaktā hai

mirī pagḌī bhī gir jaa.e to merā sar mahaktā hai

vo apne haath meñ ik phuul bhī le kar nahīñ aayā

magar jaise koī gulshan mire andar mahaktā hai

mujhe dekhe binā us kā kabhī chehrā nahīñ khiltā

ajab ḳhushbū kā jhoñkā hai mujhe chhū kar mahaktā hai

parī kī dāstānoñ se mo.attar hai udhar āñgan

idhar sālan kī ḳhushbū meñ rasoī ghar mahaktā hai

ye maanā sab ke hāthoñ meñ yahāñ kashkol hai lekin

yahī vo gaañv hai har din jahāñ lañgar mahaktā hai

na jaane ḳhvāb ke TuuTe khañDar meñ kaun aayā thā

kabhī kamra mahaktā hai kabhī bistar mahaktā hai

mire lahje meñ ghultī jā rahī hai yuuñ tirī ḳhushbū

koī bhī aa.ina dekhūñ tirā paikar mahaktā hai

salīqa yuuñ bhaTakne kā sikhāyā hai faqīroñ ne

jidhar se ham guzar jaa.eñ vahāñ ghar ghar mahaktā hai

na jaane gaañv ke panghaT meñ 'sāgar' kaun aayā thā

abhī tak dekhiye tālāb kā patthar mahaktā hai

faqiron ka chalan yun jism ke andar mahakta hai

meri pagDi bhi gir jae to mera sar mahakta hai

wo apne hath mein ek phul bhi le kar nahin aaya

magar jaise koi gulshan mere andar mahakta hai

mujhe dekhe bina us ka kabhi chehra nahin khilta

ajab KHushbu ka jhonka hai mujhe chhu kar mahakta hai

pari ki dastanon se moattar hai udhar aangan

idhar salan ki KHushbu mein rasoi ghar mahakta hai

ye mana sab ke hathon mein yahan kashkol hai lekin

yahi wo ganw hai har din jahan langar mahakta hai

na jaane KHwab ke TuTe khanDar mein kaun aaya tha

kabhi kamra mahakta hai kabhi bistar mahakta hai

mere lahje mein ghulti ja rahi hai yun teri KHushbu

koi bhi aaina dekhun tera paikar mahakta hai

saliqa yun bhaTakne ka sikhaya hai faqiron ne

jidhar se hum guzar jaen wahan ghar ghar mahakta hai

na jaane ganw ke panghaT mein 'sagar' kaun aaya tha

abhi tak dekhiye talab ka patthar mahakta hai