fareb de ke nazaron ne sath chhoD diya

fareb de ke nazāroñ ne saath chhoḌ diyā

mire junūñ kā bahāroñ ne saath chhoḌ diyā

tumhīñ ko ab dil-e-muztar kī laaj rakhnā hai

chale bhī aao sitāroñ ne saath chhoḌ diyā

nasīb vāloñ ko duniyā meñ kaun pūchhegā

agar nasīb ke māroñ ne saath chhoḌ diyā

kahīñ to maiñ ne sahāroñ pe maar dī Thokar

kahīñ pe merā sahāroñ ne saath chhoḌ diyā

gila nahīñ hai talātum kī bad-sulūkī kā

mirā hamesha kināroñ ne saath chhoḌ diyā

abhī to gardish-e-daurāñ bhī duur thī mujh se

zarā sī baat pe yāroñ ne saath chhoḌ diyā

tumhāre dam se thā vābasta-e-chaman 'anjum'

tumhāre baad bahāroñ ne saath chhoḌ diyā

fareb de ke nazaron ne sath chhoD diya

mere junun ka bahaaron ne sath chhoD diya

tumhin ko ab dil-e-muztar ki laj rakhna hai

chale bhi aao sitaron ne sath chhoD diya

nasib walon ko duniya mein kaun puchhega

agar nasib ke maron ne sath chhoD diya

kahin to main ne sahaaron pe mar di Thokar

kahin pe mera sahaaron ne sath chhoD diya

gila nahin hai talatum ki bad-suluki ka

mera hamesha kinaron ne sath chhoD diya

abhi to gardish-e-dauran bhi dur thi mujh se

zara si baat pe yaron ne sath chhoD diya

tumhaare dam se tha wabasta-e-chaman 'anjum'

tumhaare baad bahaaron ne sath chhoD diya