fareb-e-ab tilism-e-saraab TuT gaya

fareb-e-āb tilism-e-sarāab TuuT gayā

thī itnī talḳh haqīqat ki ḳhvāb TuuT gayā

nazar se uljhī huī haiñ usī kī tā'bīreñ

laraz laraz ke jo palkoñ pe ḳhvāb TuuT gayā

na soz-o-sāz na naġhma na ruuh kī āvāz

abhī chhuā bhī na thā aur rabāb TuuT gayā

havā ko rakh na sakī apnī qaid meñ koī mauj

ki ek lamha na guzrā hubāb TuuT gayā

maiñ tere naam na mansūb kar sakā jis ko

vo harf-harf pas-e-intisāb TuuT gayā

abhī bhī bojh hai dil par mire sukūn kī saañs

nazar se rishta-e-sad-iztirāb TuuT gayā

hai ab to zarra vahī is zamīn kā 'manzar'

jo āsmān pe thā āftāb TuuT gayā

fareb-e-ab tilism-e-saraab TuT gaya

thi itni talKH haqiqat ki KHwab TuT gaya

nazar se uljhi hui hain usi ki ta'biren

laraz laraz ke jo palkon pe KHwab TuT gaya

na soz-o-saz na naghma na ruh ki aawaz

abhi chhua bhi na tha aur rabab TuT gaya

hawa ko rakh na saki apni qaid mein koi mauj

ki ek lamha na guzra hubab TuT gaya

main tere nam na mansub kar saka jis ko

wo harf-harf pas-e-intisab TuT gaya

abhi bhi bojh hai dil par mere sukun ki sans

nazar se rishta-e-sad-iztirab TuT gaya

hai ab to zarra wahi is zamin ka 'manzar'

jo aasman pe tha aaftab TuT gaya