fareb-e-aql mein majnun-e-ishq aa na saka

fareb-e-aql meñ majnūn-e-ishq aa na sakā

bhulā diyā use āñkhoñ ne dil bhulā na sakā

faroġh-e-husn se rāteñ vo jagmagā na sakā

harīm-e-ishq meñ jo sham-e-dil jalā na sakā

bhulā diyā ho kabhī yaad kar ke mumkin hai

magar maiñ bhuul ke tujh ko kabhī bhulā na sakā

na dil milā na milīñ dil kī lazzateñ us ko

jo tere dard-e-mohabbat ko dil banā na sakā

diye javāb mirī ma.asiyat ke rahmat se

ham us ko bhuul ga.e vo hameñ bhulā na sakā

mujhe junūn-e-mohabbat ne us jahāñ meñ rakhā

ki jis jahāñ meñ koī inqalāb aa na sakā

guzar gayā hai mohabbat meñ ik vo aalam bhī

ki muddatoñ mujhe tū ḳhud bhī yaad aa na sakā

tajalliyāñ use apnī nazar jab aane lagīñ

nigāh-e-ishq meñ phir husn bhī samā na sakā

udhar karishma-e-husn un kī pāk-dāmānī

idhar ye haal ki īmāñ koī bachā na sakā

quyūd-e-ishq se shāhid guzar gayā ho koī

hudūd-e-husn se lekin nikal ke jā na sakā

na ban gayā ho tirā ishq-e-iztirāb kahīñ

tasalliyoñ se tirī iztirāb jā na sakā

guzar ga.ī thī tire saath zindagī kuchh din

phir us ke ba.ad maza zindagī kā aa na sakā

hamesha dair-o-haram meñ haiñ shorisheñ jis se

vo inqalāb kabhī mai-kade meñ aa na sakā

tamām-umr ko jab ho ga.e the vo mere

tamām-umr kabhī phir vo vaqt aa na sakā

ajiib chiiz hai hastī kī nīstī 'bismil'

ki jo yahāñ se gayā phir kabhī vo aa na sakā

fareb-e-aql mein majnun-e-ishq aa na saka

bhula diya use aankhon ne dil bhula na saka

farogh-e-husn se raaten wo jagmaga na saka

harim-e-ishq mein jo sham-e-dil jala na saka

bhula diya ho kabhi yaad kar ke mumkin hai

magar main bhul ke tujh ko kabhi bhula na saka

na dil mila na milin dil ki lazzaten us ko

jo tere dard-e-mohabbat ko dil bana na saka

diye jawab meri masiyat ke rahmat se

hum us ko bhul gae wo hamein bhula na saka

mujhe junun-e-mohabbat ne us jahan mein rakha

ki jis jahan mein koi inqalab aa na saka

guzar gaya hai mohabbat mein ek wo aalam bhi

ki muddaton mujhe tu KHud bhi yaad aa na saka

tajalliyan use apni nazar jab aane lagin

nigah-e-ishq mein phir husn bhi sama na saka

udhar karishma-e-husn un ki pak-damani

idhar ye haal ki iman koi bacha na saka

quyud-e-ishq se shahid guzar gaya ho koi

hudud-e-husn se lekin nikal ke ja na saka

na ban gaya ho tera ishq-e-iztirab kahin

tasalliyon se teri iztirab ja na saka

guzar gai thi tere sath zindagi kuchh din

phir us ke baad maza zindagi ka aa na saka

hamesha dair-o-haram mein hain shorishen jis se

wo inqalab kabhi mai-kade mein aa na saka

tamam-umr ko jab ho gae the wo mere

tamam-umr kabhi phir wo waqt aa na saka

ajib chiz hai hasti ki nisti 'bismil'

ki jo yahan se gaya phir kabhi wo aa na saka