fareb-e-husn hai duniya meri nazar ke liye

fareb-e-husn hai duniyā mirī nazar ke liye

nigāh-e-ishq nahīñ husn-e-rahguzar ke liye

qafas meñ rah ke na rote agar ye jānte ham

chaman meñ rah ke bhī ronā hai bāl-o-par ke liye

kisī jabīñ meñ kisī dar ke vāste bhī nahīñ

mirī jabīñ meñ jo sajde haiñ tere dar ke liye

mirī nazar ko jo tarsā rahī thī apne liye

tirī rahī hai vo sūrat mirī nazar ke liye

na chāragar ke liye mujh meñ koī vasf-e-hayāt

na vaj.h-e-mātam-e-marg aah nauhagar ke liye

tamām-umr bhī guzre jo ban ke zulmat-e-shab

kareñ na minnat-e-ḳhurshed ham sahar ke liye

ḳhushā vo daur-e-mohabbat ki vaqf ho jaa.e

jabīn-e-husn mohabbat ke sañg-e-dar ke liye

zamāna aañkh se mujh ko girā ke bhuul gayā

ik ashk thā maiñ zamāne kī chashm-e-tar ke liye

qubūliyat ko agar haiñ ibādateñ darkār

gunāh chāhiyeñ rahmat ko dar-guzar ke liye

kiyā ḳhayāl na apnā bhī kuchh mirī ḳhātir

duā.eñ kī haiñ sitāroñ ne bhī sahar ke liye

chaman ne phuul diye aur shafaq ne rañg diyā

shuā.eñ chāñd ne diiñ terī rahguzar ke liye

vo zindagī hai mohabbat ki jis ke zer-e-asar

nafas nafas meñ ho ik maut umr-bhar ke liye

balā-e-ishq se bismil na rakh umīd-e-najāt

duā-e-sub.h na kar shām-e-be-sahar ke liye

fareb-e-husn hai duniya meri nazar ke liye

nigah-e-ishq nahin husn-e-rahguzar ke liye

qafas mein rah ke na rote agar ye jaante hum

chaman mein rah ke bhi rona hai baal-o-par ke liye

kisi jabin mein kisi dar ke waste bhi nahin

meri jabin mein jo sajde hain tere dar ke liye

meri nazar ko jo tarsa rahi thi apne liye

teri rahi hai wo surat meri nazar ke liye

na chaaragar ke liye mujh mein koi wasf-e-hayat

na wajh-e-matam-e-marg aah nauhagar ke liye

tamam-umr bhi guzre jo ban ke zulmat-e-shab

karen na minnat-e-KHurshed hum sahar ke liye

KHusha wo daur-e-mohabbat ki waqf ho jae

jabin-e-husn mohabbat ke sang-e-dar ke liye

zamana aankh se mujh ko gira ke bhul gaya

ek ashk tha main zamane ki chashm-e-tar ke liye

qubuliyat ko agar hain ibaadaten darkar

gunah chahiyen rahmat ko dar-guzar ke liye

kiya KHayal na apna bhi kuchh meri KHatir

duaen ki hain sitaron ne bhi sahar ke liye

chaman ne phul diye aur shafaq ne rang diya

shuaen chand ne din teri rahguzar ke liye

wo zindagi hai mohabbat ki jis ke zer-e-asar

nafas nafas mein ho ek maut umr-bhar ke liye

bala-e-ishq se bismil na rakh umid-e-najat

dua-e-subh na kar sham-e-be-sahar ke liye