fareb-e-manzar ke istiaron se dil jo apna laga rahe hain

fareb-e-manzar ke isti'āroñ se dil jo apnā lagā rahe haiñ

vahī dhaḌakte hue diloñ se nigāh apnī churā rahe haiñ

'ajīb sī kashmakash hai logo zamīr ālūda-e-zamāñ hai

sharī'at-e-'ishq ke musāfir yahāñ-vahāñ sar jhukā rahe haiñ

'ajab mizāj-e-karam hai un kā guloñ se apnī nazar ko phere

nayā hai andāz-e-bāġhbānī ki ḳhaar ko gul banā rahe haiñ

ġhubār-e-dil jo uḌā huā hai kahīñ vo dāman meñ aa na jaa.e

baḌī adā se baḌe hunar se vo apnā dāman bachā rahe haiñ

guloñ se shādāb zaḳhm-e-dil kā fasāna kaise sunā.e koī

har ek shāḳh-e-chaman pe taa.ir tarāne ḳhushiyoñ ke gā rahe haiñ

kahāñ vo sailāb vo samundar kahāñ ye ātish-fishāñ sā manzar

har ek tuġhyānī-e-karam ko javāz-e-dil ham banā rahe haiñ

fasāne dil ke haiñ ḳhatm saare ki bazm-e-ulfat simaT chukī hai

bas ek ham haiñ ki chashm-e-girya lahū se apne bahā rahe haiñ

ki dard-e-man shud sukūn-e-murshid sunā thā ham ne kisī zabāñ meñ

nuqūsh chehre ke apne 'maḳhfī' vahī hikāyat sunā rahe haiñ

fareb-e-manzar ke isti'aron se dil jo apna laga rahe hain

wahi dhaDakte hue dilon se nigah apni chura rahe hain

'ajib si kashmakash hai logo zamir aaluda-e-zaman hai

shari'at-e-'ishq ke musafir yahan-wahan sar jhuka rahe hain

'ajab mizaj-e-karam hai un ka gulon se apni nazar ko phere

naya hai andaz-e-baghbani ki KHar ko gul bana rahe hain

ghubar-e-dil jo uDa hua hai kahin wo daman mein aa na jae

baDi ada se baDe hunar se wo apna daman bacha rahe hain

gulon se shadab zaKHm-e-dil ka fasana kaise sunae koi

har ek shaKH-e-chaman pe tair tarane KHushiyon ke ga rahe hain

kahan wo sailab wo samundar kahan ye aatish-fishan sa manzar

har ek tughyani-e-karam ko jawaz-e-dil hum bana rahe hain

fasane dil ke hain KHatm sare ki bazm-e-ulfat simaT chuki hai

bas ek hum hain ki chashm-e-girya lahu se apne baha rahe hain

ki dard-e-man shud sukun-e-murshid suna tha hum ne kisi zaban mein

nuqush chehre ke apne 'maKHfi' wahi hikayat suna rahe hain