fareb jhuT dagha hai hamari basti mein

fareb jhuuT daġhā hai hamārī bastī meñ

ye kaisā zahr ghulā hai hamārī bastī meñ

charāġh ban ke jo sab ke diloñ meñ raushan thā

usī kā ghar to jalā hai hamārī bastī meñ

maiñ kyā batā.ūñ miyāñ kaun ḳhairiyat se hai

sabhī kā haal burā hai hamārī bastī meñ

unheñ bharosa hai tīr-o-kamān par apne

hameñ yaqīñ hai ḳhudā hai hamārī bastī meñ

hazār dhūñDiye banda koī nahīñ miltā

har ek shaḳhs ḳhudā hai hamārī bastī meñ

har ek aañkh meñ aañsū har ek lab pe fuġhāñ

ye kaisī āb-o-havā hai hamārī bastī meñ

'vaqār' aaj talak bhī samajh na paa.e ham

ki kaun kis pe fidā hai hamārī bastī meñ

fareb jhuT dagha hai hamari basti mein

ye kaisa zahr ghula hai hamari basti mein

charagh ban ke jo sab ke dilon mein raushan tha

usi ka ghar to jala hai hamari basti mein

main kya bataun miyan kaun KHairiyat se hai

sabhi ka haal bura hai hamari basti mein

unhen bharosa hai tir-o-kaman par apne

hamein yaqin hai KHuda hai hamari basti mein

hazar dhunDiye banda koi nahin milta

har ek shaKHs KHuda hai hamari basti mein

har ek aankh mein aansu har ek lab pe fughan

ye kaisi aab-o-hawa hai hamari basti mein

'waqar' aaj talak bhi samajh na pae hum

ki kaun kis pe fida hai hamari basti mein