fareb khana nahin bar bar chiKHta hai

fareb khānā nahīñ baar baar chīḳhtā hai

nadī kī tah se koī regzār chīḳhtā hai

badan ke ġhaar se be-iḳhtiyār chīḳhtā hai

shikār hone se pahle shikār chīḳhtā hai

tamām din to nahīñ TūTtā tilism-e-sadā

tamām raat bhī bas intizār chīḳhtā hai

udhar na jaanā udhar rāste meñ manzil hai

safar kā lutf sar-e-rahguzār chīḳhtā hai

mahāz-e-jañg meñ pahle harīf tai to hoñ

lagām thāme hue shahsavār chīḳhtā hai

tamām umr kā hāsil hai sirf tanhā.ī

bulandiyoñ se koī kohsār chīḳhtā hai

isī liye to maiñ ḳhud se hī bhāgā phirtā huuñ

koī hai mujh meñ nasīhat-guzār chīḳhtā hai

fareb khana nahin bar bar chiKHta hai

nadi ki tah se koi regzar chiKHta hai

badan ke ghaar se be-iKHtiyar chiKHta hai

shikar hone se pahle shikar chiKHta hai

tamam din to nahin TuTta tilism-e-sada

tamam raat bhi bas intizar chiKHta hai

udhar na jaana udhar raste mein manzil hai

safar ka lutf sar-e-rahguzar chiKHta hai

mahaz-e-jang mein pahle harif tai to hon

lagam thame hue shahsawar chiKHta hai

tamam umr ka hasil hai sirf tanhai

bulandiyon se koi kohsar chiKHta hai

isi liye to main KHud se hi bhaga phirta hun

koi hai mujh mein nasihat-guzar chiKHta hai