farhad nahin majnun ranjha bhi nahin hun

farhād nahīñ majnūñ rāñjhā bhī nahīñ huuñ

huuñ ishq kā maarā magar itnā bhī nahīñ huuñ

kyoñ tanz kase haiñ mire kirdār pe ai dost

gar achchhā nahīñ huuñ tire jaisā bhī nahīñ huuñ

vo aa.eñ to samjheñ ki mirā haal burā hai

maiñ is liye ghar apnā sajātā bhī nahīñ huuñ

badnām mujhe kar ke vo mash.hūr hue haiñ

so is liye mahfil meñ maiñ jaatā bhī nahīñ huuñ

kyoñ dekh ke hañstā hai zamāna mujhe 'shīrāz'

maiñ bhiiḌ nahīñ huuñ to tamāsha bhī nahīñ huuñ

farhad nahin majnun ranjha bhi nahin hun

hun ishq ka mara magar itna bhi nahin hun

kyon tanz kase hain mere kirdar pe ai dost

gar achchha nahin hun tere jaisa bhi nahin hun

wo aaen to samjhen ki mera haal bura hai

main is liye ghar apna sajata bhi nahin hun

badnam mujhe kar ke wo mashhur hue hain

so is liye mahfil mein main jata bhi nahin hun

kyon dekh ke hansta hai zamana mujhe 'shiraaz'

main bhiD nahin hun to tamasha bhi nahin hun