farogh-e-dida-o-dil lala-e-sahar ki tarah

faroġh-e-dīda-o-dil lāla-e-sahar kī tarah

ujālā bin ke raho sham-e-rahguzar kī tarah

payambaroñ kī tarah se jiyo zamāne meñ

payām-e-shauq bano daulat-e-hunar kī tarah

ye zindagī bhī koī zindagī hai ham-nafaso

sitāra ban ke jale bujh ga.e sharar kī tarah

Darā sakī na mujhe tīrgī zamāne kī

añdherī raat se guzrā huuñ maiñ qamar kī tarah

samundaroñ ke talātum ne mujh ko paalā hai

chamak rahā huuñ isī vāste guhar kī tarah

tamām koh o tal o bahr o bar haiñ zer-e-nagīñ

khulā huā huuñ maiñ shāhīñ ke bāl-o-par kī tarah

tamām daulat-e-kaunain hai ḳhirāj us kā

ye dil nahīñ kisī luuTe hue nagar kī tarah

guzar ke ḳhaar se ġhunche se gul se shabnam se

maiñ shāḳh-e-vaqt meñ aayā huuñ ik samar kī tarah

maiñ dil meñ talḳhī-e-zahrāb-e-ġham bhī rakhtā huuñ

na misl-e-shahd huuñ shīrīñ na maiñ shakar kī tarah

ḳhizāñ ke dast-e-sitam ne mujhe chhuā hai magar

tamām sho.ala o shabnam huuñ kāshmar kī tarah

mirī navā meñ hai lutf-o-surūr-e-sub.h-e-nashāt

har ek sher hai rindoñ kī shām-e-tar kī tarah

ye fātehāna ġhazal asr-e-nau kā hai āhañg

buland o past ko dekhā hai dīda-var kī tarah

farogh-e-dida-o-dil lala-e-sahar ki tarah

ujala bin ke raho sham-e-rahguzar ki tarah

payambaron ki tarah se jiyo zamane mein

payam-e-shauq bano daulat-e-hunar ki tarah

ye zindagi bhi koi zindagi hai ham-nafaso

sitara ban ke jale bujh gae sharar ki tarah

Dara saki na mujhe tirgi zamane ki

andheri raat se guzra hun main qamar ki tarah

samundaron ke talatum ne mujh ko pala hai

chamak raha hun isi waste guhar ki tarah

tamam koh o tal o bahr o bar hain zer-e-nagin

khula hua hun main shahin ke baal-o-par ki tarah

tamam daulat-e-kaunain hai KHiraj us ka

ye dil nahin kisi luTe hue nagar ki tarah

guzar ke KHar se ghunche se gul se shabnam se

main shaKH-e-waqt mein aaya hun ek samar ki tarah

main dil mein talKHi-e-zahrab-e-gham bhi rakhta hun

na misl-e-shahd hun shirin na main shakar ki tarah

KHizan ke dast-e-sitam ne mujhe chhua hai magar

tamam shoala o shabnam hun kashmar ki tarah

meri nawa mein hai lutf-o-surur-e-subh-e-nashat

har ek sher hai rindon ki sham-e-tar ki tarah

ye fatehana ghazal asr-e-nau ka hai aahang

buland o past ko dekha hai dida-war ki tarah