farogh-e-husn ki tabaniyan kabhi na gain

faroġh-e-husn kī tābāniyāñ kabhī na ga.iiñ

nigāh-o-dil kī bhī hairāniyāñ kabhī na ga.iiñ

har ek samt se yūrish thī hādsoñ kī magar

samand-e-fikr kī jaulāniyāñ kabhī na ga.iiñ

ḳhizāñ-gazīda bahāroñ ko de rahī haiñ ḳharāj

mirī nigāhoñ kī nādāniyāñ kabhī na ga.iiñ

lab-e-furāt haiñ pahre yazīdiyoñ ke hanūz

sitamgaroñ kī sitam-rāniyāñ kabhī na ga.iiñ

tumhārī teġh-e-sitam kā utar gayā paanī

lahū ke qatroñ kī tābāniyāñ kabhī na ga.iiñ

tamām 'umr musallat thā hijratoñ kā 'azāb

hamārī be-sar-o-sāmāniyāñ kabhī na ga.iiñ

jarāhatoñ ke ḳhazāne gavāhī dete haiñ

matā'-e-ġham kī farāvāniyāñ kabhī na ga.iiñ

bahār-e-sub.h to raunaq dikhā ga.ī apnī

udaas shāmoñ kī vīrāniyāñ kabhī na ga.iiñ

sadā.eñ de ke jagāte rahe sahar ke naqīb

magar hamārī tan-āsāniyāñ kabhī na ga.iiñ

qadam qadam pe hazīmat kā sāmnā 'bahzād'

magar zabāñ kī rajaz-ḳhvāniyāñ kabhī na ga.iiñ

farogh-e-husn ki tabaniyan kabhi na gain

nigah-o-dil ki bhi hairaniyan kabhi na gain

har ek samt se yurish thi hadson ki magar

samand-e-fikr ki jaulaniyan kabhi na gain

KHizan-gazida bahaaron ko de rahi hain KHaraj

meri nigahon ki nadaniyan kabhi na gain

lab-e-furaat hain pahre yazidiyon ke hanuz

sitamgaron ki sitam-raniyan kabhi na gain

tumhaari tegh-e-sitam ka utar gaya pani

lahu ke qatron ki tabaniyan kabhi na gain

tamam 'umr musallat tha hijraton ka 'azab

hamari be-sar-o-samaniyan kabhi na gain

jarahaton ke KHazane gawahi dete hain

mata'-e-gham ki farawaniyan kabhi na gain

bahaar-e-subh to raunaq dikha gai apni

udas shamon ki viraniyan kabhi na gain

sadaen de ke jagate rahe sahar ke naqib

magar hamari tan-asaniyan kabhi na gain

qadam qadam pe hazimat ka samna 'bahzad'

magar zaban ki rajaz-KHwaniyan kabhi na gain