farq jab lazzat-e-ehsas mein paya na gaya

farq jab lazzat-e-ehsās meñ paayā na gayā

dard dekhā na gayā tum ko dikhāyā na gayā

chuTkiyāñ kaun ye rah rah ke liye jaatā hai

mere dil meñ to mirī jaañ koī aayā na gayā

lutf yuuñ ranjish-e-be-jā ke liye pahroñ tak

be-sabab rūThne vaale ko manāyā na gayā

ḳhvāb-e-pur-kaif kā manzar bhī nashāt-āvar thā

dost ko is liye kuchh der jagāyā na gayā

man.a kartī jo rahī ḳhanda-jabīnī us kī

dard-e-dil apnā kabhī us ko sunāyā na gayā

ḳhud hañsā vo ye javānī kī karam-baḳhshī hai

ḳhusrav-e-husn ko mujh se to hañsāyā na gayā

de to dī zabt-e-mohabbat kī qasam zālim ne

fā.eda zabt-e-mohabbat kā batāyā na gayā

kab dikhātā hai vo barbādī-e-hasrat kā samāñ

ḳhaak meñ jab mirī hasrat ko milāyā na gayā

raushnī jis kī dikhātī thī mujhe bhuul hī bhuul

us qamar-vash kā vo andāz bhulāyā na gayā

tuur kī puurī tarah yaad dilā.ī na ga.ī

hosh chhīne to ga.e hosh meñ laayā na gayā

un kī mashkūk nazar meñ vo mazā thā manzūr

ki yaqīñ apnī mohabbat kā dilāyā na gayā

farq jab lazzat-e-ehsas mein paya na gaya

dard dekha na gaya tum ko dikhaya na gaya

chuTkiyan kaun ye rah rah ke liye jata hai

mere dil mein to meri jaan koi aaya na gaya

lutf yun ranjish-e-be-ja ke liye pahron tak

be-sabab ruThne wale ko manaya na gaya

KHwab-e-pur-kaif ka manzar bhi nashat-awar tha

dost ko is liye kuchh der jagaya na gaya

mana karti jo rahi KHanda-jabini us ki

dard-e-dil apna kabhi us ko sunaya na gaya

KHud hansa wo ye jawani ki karam-baKHshi hai

KHusraw-e-husn ko mujh se to hansaya na gaya

de to di zabt-e-mohabbat ki qasam zalim ne

faeda zabt-e-mohabbat ka bataya na gaya

kab dikhata hai wo barbaadi-e-hasrat ka saman

KHak mein jab meri hasrat ko milaya na gaya

raushni jis ki dikhati thi mujhe bhul hi bhul

us qamar-wash ka wo andaz bhulaya na gaya

tur ki puri tarah yaad dilai na gai

hosh chhine to gae hosh mein laya na gaya

un ki mashkuk nazar mein wo maza tha manzur

ki yaqin apni mohabbat ka dilaya na gaya