farq tujhse hai ek zara mujh mein

farq tujh se hai ik zarā mujh meñ

sang tujh meñ hai aa.ina mujh meñ

bebasī kī faqat kitāb nahīñ

azm-e-mohkam bhī hai likhā mujh meñ

fahm-o-dānish kā nuur huuñ yaksar

fikr kā jaltā hai diyā mujh meñ

mahr-o-īsār kā samundar huuñ

aur dariyā hai pyaar kā mujh meñ

mujh meñ jharnā hai narm-ḳhūī kā

saath laavā bhī hai chhupā mujh meñ

mere qadmoñ tale hai jannat bhī

aur dozaḳh kā rāsta mujh meñ

mere har ġham kā tū masīhā hai

tere har dukh kī hai davā mujh meñ

sab ravayye pe tere hai mauqūf

ḳhaar ugā de yā gul khilā mujh meñ

farq tujh se hai ek zara mujh mein

sang tujh mein hai aaina mujh mein

bebasi ki faqat kitab nahin

azm-e-mohkam bhi hai likha mujh mein

fahm-o-danish ka nur hun yaksar

fikr ka jalta hai diya mujh mein

mahr-o-isar ka samundar hun

aur dariya hai pyar ka mujh mein

mujh mein jharna hai narm-KHui ka

sath lawa bhi hai chhupa mujh mein

mere qadmon tale hai jannat bhi

aur dozaKH ka rasta mujh mein

mere har gham ka tu masiha hai

tere har dukh ki hai dawa mujh mein

sab rawayye pe tere hai mauquf

KHar uga de ya gul khila mujh mein