fasil-e-jism gira kar bikhar na jaun main

fasīl-e-jism girā kar bikhar na jā.ūñ maiñ

yahī ḳhayāl hai jī meñ ki ghar na jā.ūñ maiñ

badan ke tapte jahannam meñ ḳhvāhishoñ kā safar

isī safar ke bhañvar meñ utar na jā.ūñ maiñ

huī tamām masāfat is ek ḳhvāhish meñ

ki ab vo laakh bulā.e magar na jā.ūñ maiñ

bikher detā hai kuchh aur jab bhī miltā hai

use to vahm yahī hai sañvar na jā.ūñ maiñ

vo jis kī chaah meñ dushvār manzileñ tai kiiñ

ḳhamosh us ke nagar se guzar na jā.ūñ maiñ

'naved' us se mirā rabt lafz o ma.anī kā

ye rābta na rahe gar to mar na jā.ūñ maiñ

fasil-e-jism gira kar bikhar na jaun main

yahi KHayal hai ji mein ki ghar na jaun main

badan ke tapte jahannam mein KHwahishon ka safar

isi safar ke bhanwar mein utar na jaun main

hui tamam masafat is ek KHwahish mein

ki ab wo lakh bulae magar na jaun main

bikher deta hai kuchh aur jab bhi milta hai

use to wahm yahi hai sanwar na jaun main

wo jis ki chah mein dushwar manzilen tai kin

KHamosh us ke nagar se guzar na jaun main

'nawed' us se mera rabt lafz o mani ka

ye rabta na rahe gar to mar na jaun main