fasil-e-jism ki unchai se utar jaen

fasīl-e-jism kī ūñchā.ī se utar jaa.eñ

to is ḳharābe se ham log phir kidhar jaa.eñ

havā batātī hai guzregā kārvāñ koī

kuchh aur der isī raah par Thahar jaa.eñ

tamām din to lahū chāTtā rahā sūraj

huī hai shaam chalo apne apne ghar jaa.eñ

kabhī to koī lahū ke diye jalā.egā

chalo nishān-e-qadam apnā chhoḌ kar jaa.eñ

abhī sadā na do kuchh der aur sūraj ko

ye jitnī sūkhī huī naddiyāñ haiñ bhar jaa.eñ

ye shash-jihat to bas ik naqsh-e-pā kā vaqfa hai

tumhīñ batāo kahāñ aa ke ham Thahar jaa.eñ

'ayāz' ham ko na apnā sakī kabhī duniyā

vahī sadā hai ta.āqub meñ ham jidhar jaa.eñ

fasil-e-jism ki unchai se utar jaen

to is KHarabe se hum log phir kidhar jaen

hawa batati hai guzrega karwan koi

kuchh aur der isi rah par Thahar jaen

tamam din to lahu chaTta raha suraj

hui hai sham chalo apne apne ghar jaen

kabhi to koi lahu ke diye jalaega

chalo nishan-e-qadam apna chhoD kar jaen

abhi sada na do kuchh der aur suraj ko

ye jitni sukhi hui naddiyan hain bhar jaen

ye shash-jihat to bas ek naqsh-e-pa ka waqfa hai

tumhin batao kahan aa ke hum Thahar jaen

'ayaz' hum ko na apna saki kabhi duniya

wahi sada hai taaqub mein hum jidhar jaen