fasil-e-KHwab pe siDhi lagane wala hun

fasīl-e-ḳhvāb pe sīḌhī lagāne vaalā huuñ

maiñ ek raaz se parda uThāne vaalā huuñ

taḳhayyulāt ke daane bikher kar har-sū

zamīn-e-aql pe hairat ugāne vaalā huuñ

mirī nazar meñ ye jīvan hai jal-parī jaisā

maiñ shoḳh rang ke sāgar dikhāne vaalā huuñ

gumāñ kī had se bhī aage paḌāv Daalā hai

bahut rukā to faqat shab batāne vaalā huuñ

maiñ ā.inoñ ko ta'ajjub meñ Daal kar ik din

tamām 'aks nazar se churāne vaalā huuñ

maiñ ho gayā huuñ bahut mutma.in suhūlat meñ

so mushkilāt meñ ḳhud ko phañsāne vaalā huuñ

fasāne ḳhuub gaḌhe haiñ binā kahānī ke

ġhazal bhī 'ishq se baalā sunāne vaalā huuñ

fasil-e-KHwab pe siDhi lagane wala hun

main ek raaz se parda uThane wala hun

taKHayyulat ke dane bikher kar har-su

zamin-e-aql pe hairat ugane wala hun

meri nazar mein ye jiwan hai jal-pari jaisa

main shoKH rang ke sagar dikhane wala hun

guman ki had se bhi aage paDaw Dala hai

bahut ruka to faqat shab batane wala hun

main aainon ko ta'ajjub mein Dal kar ek din

tamam 'aks nazar se churane wala hun

main ho gaya hun bahut mutmain suhulat mein

so mushkilat mein KHud ko phansane wala hun

fasane KHub gaDhe hain bina kahani ke

ghazal bhi 'ishq se baala sunane wala hun