fasil-e-shahr ko jab tak gira nahin denge

fasīl-e-shahr ko jab tak girā nahīñ deñge

hameñ ye log kabhī rāsta nahīñ deñge

tamām umr jo chehre ko apne paḌh na sake

ham un ke hāthoñ meñ ab aa.ina nahīñ deñge

ghuTan ho aisī ki tum khul ke saañs le na sako

tumheñ ham is se ziyāda sazā nahīñ deñge

tujhe Dubo.eñge ḳhud tere hāshiya-bardār

ham apnī raah se tujh ko haTā nahīñ deñge

ye bazm-e-sh.er-o-adab kab kisī kī hai mīrās

jo nasl gūñgī ho ham jā.eza nahīñ deñge

vo jin ke naam se ham zahr pī ga.e 'nayyar'

ham un ke haq meñ kabhī bad-duā nahīñ deñge

fasil-e-shahr ko jab tak gira nahin denge

hamein ye log kabhi rasta nahin denge

tamam umr jo chehre ko apne paDh na sake

hum un ke hathon mein ab aaina nahin denge

ghuTan ho aisi ki tum khul ke sans le na sako

tumhein hum is se ziyaada saza nahin denge

tujhe Duboenge KHud tere hashiya-bardar

hum apni rah se tujh ko haTa nahin denge

ye bazm-e-sher-o-adab kab kisi ki hai miras

jo nasl gungi ho hum jaeza nahin denge

wo jin ke nam se hum zahr pi gae 'nayyar'

hum un ke haq mein kabhi bad-dua nahin denge