fasl-e-gul aai hai kal aur hi saman honge

fasl-e-gul aa.ī hai kal aur hī sāmāñ hoñge

mere dāman meñ tire dast-o-garebāñ hoñge

sab ye kāfir haiñ hasīnoñ kī na sun tū ai dil

chaar din ba.ad yahī dushman-e-īmāñ hoñge

kis tarah jā.eñge māne.a hai hameñ ḳhauf-e-mizāj

zulf pur-ḳham hai to kuchh vo bhī pareshāñ hoñge

girya anjām-e-tabassum hai na hañs ai ġhāfil

ḳhuun ro.eñge vahī zaḳhm jo ḳhandāñ hoñge

yaad aa.egā pas-e-marg hamārā ye kamāl

haal khul jā.egā jab ḳhaak meñ pinhāñ hoñge

ḳhāna-zādoñ ko kahāñ qaid-e-mohabbat se farāġh

ham vo bulbul haiñ yahīñ ḳhāk-e-gulistāñ hoñge

daur-e-har-naḳhl kareñge sifat-e-gard 'nasīm'

ham pas-e-marg bhī qurbān-e-gulistāñ hoñge

fasl-e-gul aai hai kal aur hi saman honge

mere daman mein tere dast-o-gareban honge

sab ye kafir hain hasinon ki na sun tu ai dil

chaar din baad yahi dushman-e-iman honge

kis tarah jaenge manea hai hamein KHauf-e-mizaj

zulf pur-KHam hai to kuchh wo bhi pareshan honge

girya anjam-e-tabassum hai na hans ai ghafil

KHun roenge wahi zaKHm jo KHandan honge

yaad aaega pas-e-marg hamara ye kamal

haal khul jaega jab KHak mein pinhan honge

KHana-zadon ko kahan qaid-e-mohabbat se faragh

hum wo bulbul hain yahin KHak-e-gulistan honge

daur-e-har-naKHl karenge sifat-e-gard 'nasim'

hum pas-e-marg bhi qurban-e-gulistan honge