fasl-e-gul mein hai irada su-e-sahra apna

fasl-e-gul meñ hai irāda sū-e-sahrā apnā

rañg kyā dekhiye dikhlātā hai saudā apnā

ishq meñ ham jo miTāte haiñ kisī ko kyā kaam

jaan apnī hai dil apnā hai kaleja apnā

aah ham karte haiñ ai yaar ke mahfil vaalo

donoñ hāthoñ se jigar thaam lo apnā apnā

pūchhte kyā ho judā.ī meñ jo guzrī guzrī

tum ko ma.alūm hai sab haal kaheñ kyā apnā

koī mushtāq rahā jalva kisī ne dekhā

is ko kyā kījiye maqsūm hai apnā apnā

zindagī shart hai kyā dard-e-jigar se hogā

apne haq meñ to dam apnā hai masīhā apnā

kaam aayā amal-e-nek mirā turbat meñ

lillāhil-hamd ki ik dost to niklā apnā

pūchhte haiñ jo koī naam mirā letā hai

jānte haiñ vo mujhe āshiq-e-shaidā apnā

najd meñ dard-e-jigar qais bayāñ kartā hai

ḳhuub hī ro.egī dil thaam ke lailā apnā

shahr se bhāgte haiñ dasht meñ ghabrāte haiñ

dil bahaltā hī nahīñ ab to kisī jā apnā

eḌiyāñ mujh se ragaḌvā.egī majnūñ kī tarah

naam rakkhā hai shab-e-vasl ne lailā apnā

ai 'sharaf' ḳhair to hai haal hai kyuuñ sakte kā

aa.ina le ke zarā dekho to chehrā apnā

fasl-e-gul mein hai irada su-e-sahra apna

rang kya dekhiye dikhlata hai sauda apna

ishq mein hum jo miTate hain kisi ko kya kaam

jaan apni hai dil apna hai kaleja apna

aah hum karte hain ai yar ke mahfil walo

donon hathon se jigar tham lo apna apna

puchhte kya ho judai mein jo guzri guzri

tum ko malum hai sab haal kahen kya apna

koi mushtaq raha jalwa kisi ne dekha

is ko kya kijiye maqsum hai apna apna

zindagi shart hai kya dard-e-jigar se hoga

apne haq mein to dam apna hai masiha apna

kaam aaya amal-e-nek mera turbat mein

lillahil-hamd ki ek dost to nikla apna

puchhte hain jo koi nam mera leta hai

jaante hain wo mujhe aashiq-e-shaida apna

najd mein dard-e-jigar qais bayan karta hai

KHub hi roegi dil tham ke laila apna

shahr se bhagte hain dasht mein ghabraate hain

dil bahalta hi nahin ab to kisi ja apna

eDiyan mujh se ragaDwaegi majnun ki tarah

nam rakkha hai shab-e-wasl ne laila apna

ai 'sharaf' KHair to hai haal hai kyun sakte ka

aaina le ke zara dekho to chehra apna