fasl-e-junun ke bab mein humne jo bhi kahani likhi hai

fasl-e-junūñ ke baab meñ ham ne jo bhī kahānī likhī hai

manzar-nāma jaisā bhī ho baat hamārī apnī hai

arz-e-vatan se aane vaale des kā kuchh ahvāl sunā

ḳhauf kī chādar oḌhe baiThī qaum kī hālat kaisī hai

zindābād na kahne vaale kitne bāġhī qatl hue

muhr-ba-lab logoñ ke ghar kyā sach-much roTī paktī hai

kitne bachchoñ kā mustaqbil tauq-e-asīrī pahne hai

kitne raushan chehroñ par tahrīr ġhulāmī likkhī hai

marne vaale mārne vaale ek hī ghar meñ rahte haiñ

chaukhaT chaukhaT bahne vaale ḳhuun kī rangat kaisī hai

kyā koī daar pe sajne vaalā in rāhoñ se guzrā hai

shahr ke saare rastoñ par ye kaisī gahmā-gahmī hai

tahzīboñ ke jangal meñ ye kaisā mohazzab aaqā hai

jis ne har insān kī qīmat sirf ik golī rakkhī hai

ḳhvāboñ kī ta.abīr na DhūñDo ta.abīroñ se ḳhvāb buno

har dil ko jo chhū kar guzre ye vo kahāvat lagtī hai

aaj hameñ 'āshūr' kisī ne behis qaum kā fard kahā

lahja talḳh thā lafz bure the baat to shāyad sachchī hai

fasl-e-junun ke bab mein hum ne jo bhi kahani likhi hai

manzar-nama jaisa bhi ho baat hamari apni hai

arz-e-watan se aane wale des ka kuchh ahwal suna

KHauf ki chadar oDhe baiThi qaum ki haalat kaisi hai

zindabaad na kahne wale kitne baghi qatl hue

muhr-ba-lab logon ke ghar kya sach-much roTi pakti hai

kitne bachchon ka mustaqbil tauq-e-asiri pahne hai

kitne raushan chehron par tahrir ghulami likkhi hai

marne wale marne wale ek hi ghar mein rahte hain

chaukhaT chaukhaT bahne wale KHun ki rangat kaisi hai

kya koi dar pe sajne wala in rahon se guzra hai

shahr ke sare raston par ye kaisi gahma-gahmi hai

tahzibon ke jangal mein ye kaisa mohazzab aaqa hai

jis ne har insan ki qimat sirf ek goli rakkhi hai

KHwabon ki tabir na DhunDo tabiron se KHwab buno

har dil ko jo chhu kar guzre ye wo kahawat lagti hai

aaj hamein 'ashur' kisi ne behis qaum ka fard kaha

lahja talKH tha lafz bure the baat to shayad sachchi hai