fasl-e-KHizan mein sair jo ki humne ja-e-gul

fasl-e-ḳhizāñ meñ sair jo kī ham ne jā-e-gul

chhānī chaman kī ḳhaak na thā naqsh-e-pā-e-gul

allāh re andalīb kī āvāz-e-dil-ḳharāsh

jī hī nikal gayā jo kahā un ne haa.e gul

maqdūr tak sharāb se rakh añkhḌiyoñ meñ rañg

ye chashmak-e-pyāla hai saaqī havā-e-gul

ye dekh siina daaġh se rashk-e-chaman hai yaañ

bulbul sitam huā na jo tū ne bhī khaa.e gul

bulbul hazār jī se ḳharīdār us kī hai

ai gul-farosh kariyo samajh kar bahā-e-gul

niklā hai aisī ḳhaak se kis sāda-rū kī ye

qābil durūd bhejne ke hai safā-e-gul

baare sarishk-e-surḳh ke dāġhoñ se raat ko

bistar par apne sote the ham bhī bichhā.e gul

aa andalīb sulh kareñ jañg ho chukī

le ai zabāñ-darāz tū sab kuchh sivā.e gul

gulchīñ samajh ke chuniyo ki gulshan meñ 'mīr' ke

laḳht-e-jigar paḌe haiñ nahīñ barg-hā-e-gul

fasl-e-KHizan mein sair jo ki hum ne ja-e-gul

chhani chaman ki KHak na tha naqsh-e-pa-e-gul

allah re andalib ki aawaz-e-dil-KHarash

ji hi nikal gaya jo kaha un ne hae gul

maqdur tak sharab se rakh ankhDiyon mein rang

ye chashmak-e-pyala hai saqi hawa-e-gul

ye dekh sina dagh se rashk-e-chaman hai yan

bulbul sitam hua na jo tu ne bhi khae gul

bulbul hazar ji se KHaridar us ki hai

ai gul-farosh kariyo samajh kar baha-e-gul

nikla hai aisi KHak se kis sada-ru ki ye

qabil durud bhejne ke hai safa-e-gul

bare sarishk-e-surKH ke daghon se raat ko

bistar par apne sote the hum bhi bichhae gul

aa andalib sulh karen jang ho chuki

le ai zaban-daraaz tu sab kuchh siwae gul

gulchin samajh ke chuniyo ki gulshan mein 'mir' ke

laKHt-e-jigar paDe hain nahin barg-ha-e-gul