fasurda dagh-e-jigar dil-ruba nahin rahta

fasurda dāġh-e-jigar dil-rubā nahīñ rahtā

charāġh ishq kā hargiz bujhā nahīñ rahtā

baġhal meñ rashk se dil dil-rubā nahīñ rahtā

ḳhafā hai ye ki tū mujh se ḳhafā nahīñ rahtā

hamesha husn sun ai bevafā nahīñ rahtā

kabhī zamāna sadā ek sā nahīñ rahtā

bujhī jo sham.a to parvānoñ pe huā raushan

ki ba.ad-e-marg koī āshnā nahīñ rahtā

kahāñ vo girya vo naala vo jāñ-ba-lab rahnā

kisī kā kaam hamesha banā nahīñ rahtā

ḳhudā-na-ḳhāsta tum to sanam nahīñ aise

tumhāre dil meñ to kiina sadā nahīñ rahtā

kahā jo maiñ ne ki ai rashk-e-māh ghar meñ mire

tū mehrbānī se kyuuñ ik zarā nahīñ rahtā

lagā ye kahne ki haañ haañ hai ye bhī apnā shauq

nahīñ nahīñ nahīñ rahtā huuñ jā nahīñ rahtā

jo mujh ko kahiye maiñ āñkhoñ se zabt-e-girya karūñ

mirā qusūr nahīñ dil mirā nahīñ rahtā

yahāñ mujhe hī nasīhat ko haiñ sabhī maujūd

vahāñ to hosh kisī kā bajā nahīñ rahtā

ye dāġh-e-ishq hai kyūñ-kar na gul khile is kā

hazār is ko chhupāo chhupā nahīñ rahtā

jo dil liyā hai to bosa bhī do samajh rakkho

ki bad-mo.āmlagī meñ mazā nahīñ rahtā

lagā.ī taak hai kyuuñ mohtasib ne tujh pe dilā

agar tū duḳhtar-e-raz se bhalā nahīñ rahtā

na khīñch teġh tū 'ehsān' nā-tavān pe aah

miyāñ ye zor kisī kā sadā nahīñ rahtā

fasurda dagh-e-jigar dil-ruba nahin rahta

charagh ishq ka hargiz bujha nahin rahta

baghal mein rashk se dil dil-ruba nahin rahta

KHafa hai ye ki tu mujh se KHafa nahin rahta

hamesha husn sun ai bewafa nahin rahta

kabhi zamana sada ek sa nahin rahta

bujhi jo shama to parwanon pe hua raushan

ki baad-e-marg koi aashna nahin rahta

kahan wo girya wo nala wo jaan-ba-lab rahna

kisi ka kaam hamesha bana nahin rahta

KHuda-na-KHasta tum to sanam nahin aise

tumhaare dil mein to kina sada nahin rahta

kaha jo main ne ki ai rashk-e-mah ghar mein mere

tu mehrbani se kyun ek zara nahin rahta

laga ye kahne ki han han hai ye bhi apna shauq

nahin nahin nahin rahta hun ja nahin rahta

jo mujh ko kahiye main aankhon se zabt-e-girya karun

mera qusur nahin dil mera nahin rahta

yahan mujhe hi nasihat ko hain sabhi maujud

wahan to hosh kisi ka baja nahin rahta

ye dagh-e-ishq hai kyun-kar na gul khile is ka

hazar is ko chhupao chhupa nahin rahta

jo dil liya hai to bosa bhi do samajh rakkho

ki bad-moamlagi mein maza nahin rahta

lagai tak hai kyun mohtasib ne tujh pe dila

agar tu duKHtar-e-raz se bhala nahin rahta

na khinch tegh tu 'ehsan' na-tawan pe aah

miyan ye zor kisi ka sada nahin rahta