fasurda hai ilm harf-ha-e-kitab bhi bujh ke rah gae hain

fasurda hai ilm harf-hā-e-kitāb bhī bujh ke rah ga.e haiñ

hai raakh hī raakh madrasoñ meñ nisāb bhī bujh ke rah ga.e haiñ

diloñ meñ sho.ale sisak rahe haiñ jamī huī barf hai laboñ par

savāl bhī bujh ke rah ga.e haiñ javāb bhī bujh ke rah ga.e haiñ

nahīñ hai mahfil meñ koī garmī hue haiñ dil sard mutriboñ ke

dhuāñ nikaltā hai uñgliyoñ se raubāb bhī bujh ke rah ga.e haiñ

charāġh-e-sāġhar se lau lagā kar na paayā kuchh bhī fasurdagī ne

ki ġham to ye hai ki sho.ala-hā-e-sharāb bhī bujh ke rah ga.e haiñ

giraft-e-tūfāñ meñ aa gayā hai ḳhayāl kā sho.ala-posh dāman

rahe haqīqat hī jin se raushan vo ḳhvāb bhī bujh ke rah ga.e haiñ

bujhā bujhā sā hai qalb-e-sahrā bujhī bujhī sī hai reg-e-tābāñ

fareb khā.egī tishnagī kyā sarāb bhī bujh ke rah ga.e haiñ

hai munfa.il zauq-e-sho.ala-chīnī araq araq hai jabīn-e-ḳhirman

kahāñ se ā.eñge barq-pāre sahāb bhī bujh ke rah ga.e haiñ

fasurda hai ilm harf-ha-e-kitab bhi bujh ke rah gae hain

hai rakh hi rakh madrason mein nisab bhi bujh ke rah gae hain

dilon mein shoale sisak rahe hain jami hui barf hai labon par

sawal bhi bujh ke rah gae hain jawab bhi bujh ke rah gae hain

nahin hai mahfil mein koi garmi hue hain dil sard mutribon ke

dhuan nikalta hai ungliyon se raubab bhi bujh ke rah gae hain

charagh-e-saghar se lau laga kar na paya kuchh bhi fasurdagi ne

ki gham to ye hai ki shoala-ha-e-sharab bhi bujh ke rah gae hain

giraft-e-tufan mein aa gaya hai KHayal ka shoala-posh daman

rahe haqiqat hi jin se raushan wo KHwab bhi bujh ke rah gae hain

bujha bujha sa hai qalb-e-sahra bujhi bujhi si hai reg-e-taban

fareb khaegi tishnagi kya sarab bhi bujh ke rah gae hain

hai munfail zauq-e-shoala-chini araq araq hai jabin-e-KHirman

kahan se aaenge barq-pare sahab bhi bujh ke rah gae hain