faza aisi ba-faiz-e-baghban malum hoti hai

fazā aisī ba-faiz-e-bāġhbāñ ma.alūm hotī hai

bahār-e-gulsitāñ misl-e-ḳhizāñ ma.alūm hotī hai

kuchh apnoñ kā karam hai kuchh nigāh-e-asr-e-hāzir hai

hayāt ik hasratoñ kī dāstāñ ma.alūm hotī hai

ajab tahqīr sī tafrīq-o-be-zārī sī nafrat sī

darūn-e-qalb mīr-e-kārvāñ ma.alūm hotī hai

diloñ meñ masjidoñ meñ mandiroñ meñ dars-gāhoñ meñ

siyāsat hī siyāsat hukmrāñ ma.alūm hotī hai

girānī rishvateñ ghaple ġhaban ifsād golī bam

yahī āzādī-e-hindostāñ ma.alūm hotī hai

ḳhushāmad is qadar bhī sāthiyo achchhī nahīñ lagtī

tumhāre muñh meñ auroñ kī zabāñ ma.alūm hotī hai

'sa.ādat' jhāñk un ke dil meñ ḳhud nafrat bharī hogī

ye duniyā jin ko nafrat kā jahāñ ma.alūm hotī hai

faza aisi ba-faiz-e-baghban malum hoti hai

bahaar-e-gulsitan misl-e-KHizan malum hoti hai

kuchh apnon ka karam hai kuchh nigah-e-asr-e-hazir hai

hayat ek hasraton ki dastan malum hoti hai

ajab tahqir si tafriq-o-be-zari si nafrat si

darun-e-qalb mir-e-karwan malum hoti hai

dilon mein masjidon mein mandiron mein dars-gahon mein

siyasat hi siyasat hukmran malum hoti hai

girani rishwaten ghaple ghaban ifsad goli bam

yahi aazadi-e-hindostan malum hoti hai

KHushamad is qadar bhi sathiyo achchhi nahin lagti

tumhaare munh mein auron ki zaban malum hoti hai

'saadat' jhank un ke dil mein KHud nafrat bhari hogi

ye duniya jin ko nafrat ka jahan malum hoti hai